Bakı, 6 may, AZƏRTAC
Monteneqroda keçirilən Millətlər Liqası turnirinin qalibi olmağımız Avropa çempionatı öncəsi komandamız üçün yaxşı motivasiya oldu.
Bu sözləri AZƏRTAC-a açıqlamasında Azərbaycanın minifutbol millisinin üzvü Vüsal İsayev deyib.
O, turnirin səviyyəsindən asılı olmayaraq qazanılan çempionluğun vacib olduğunu bildirib: “Yarışda dörd komanda mübarizə aparırdı. Reqlamentə əsasən, bütün kollektivlər qrup mərhələsində bir-biri ilə qarşılaşırdı. İlk iki yeri tutan komandalar finalda, digər yığmalar isə üçüncü yer uğrunda mübarizə aparırdı. Hazırda təlim-məşq toplanışımız davam edir. Mayın 9-da Bakıya qayıdacağıq”.
27 may - 4 iyun tarixlərində Slovakiyanın paytaxtı Bratislavada keçiriləcək Avropa çempionatı barədə də danışan V. İsayev yarışa son dünya çempionu kimi qatılacaqlarını xatırladıb: “Təbii ki, bu status gözləntiləri artırır və müəyyən təzyiq yaradır. Amma nə etməli olduğumuzu yaxşı bilirik. Kifayət qədər təcrübəmiz var. Bizi dəstəkləyənləri sevindirməyə çalışacağıq”.
Oyunçu heyətdə ciddi dəyişiklik olmadığını vurğulayıb: “Komandada gənc futbolçular var. Amma onları yeni oyunçu adlandırmazdım. Daim millinin toplanışlarında iştirak ediblər. Dünya çempionatından sonra heyətdə böyük dəyişiklik olmayıb”.
Minifutbolçu hazırda formasını geyindiyi “Birbaşa” klubundakı gələcəyinə də toxunub: “Bakıda keçirilən dünya çempionatından sonra xarici klublardan təkliflər almışam. Lakin hazırda legioner həyatı yaşamağı düşünmürəm. Növbəti mövsümdə də “Birbaşa”da çıxış edəcəyəm”.
