Rəşad Məmmədov: “Onunla yenidən qarşılaşacağıq”

Yunan-Roma güləşi üzrə Avropa üçüncüsü Rəşad Məmmədov (55 kq) Tiranadakı yarışla bağl təəssüratlarını bölüşüb.

Arena.az xəbər verir ki, o, Azərbaycan Güləş Federasiyasının mətbuat xidmətinə açıqlamasında bunları söyləyib:

“İki il əvvəl Avropa çempionatında gümüş medal qazanmışdım. Bu il qızıl medal əldə etmək istəyirdim. Qismət olmadı. Amma yenə də vətənə medalsız qayıtmadıq.

Qarşıda yarışlarımız çoxdur. Fikirləşirəm ki, biz yenə Emin Seferşayevlə qarşılaşacağıq. İnşallah, bu məğlubiyyət təkrarlanmayacaq.

Eldəniz Əzizlinin burada olması mənim üçün böyük stimul idi. Mənə görüşlə bağlı bütün məsləhətlərini vermişdi”.

Xatırladaq ki, Albaniyanın paytaxtı Tiranada keçirilən Avropa çempionatında 55 kq çəki dərəcəsində mübarizə aparan Rəşad Məmmədov 1/4 finalda rusiyalı Avropa çempionu və dünya mükafatçısı Emin Seferşayevə 0:3 hesabıyla məğlub olub. Rəqib finala yüksəldiyi üçün həmyerlimiz bürünc medal uğrunda güləşib. Rəqib türkiyəli Ömər Rəcəp olub. Rəşad bu rəqibinə tam üstünlüklə (8:0) qalib gələrək bürünc medalı boynundan asıb.