ain.az bildirir, Qafqazinfo saytına əsaslanaraq.
“ABŞ-dən güclü olmasaq da, düşməni dəf etdik”.
“Qafqazinfo” xəbər verir ki, bunu İran parlamentinin spikeri Məhəmməd Baqer Qalibaf “Press TV”yə müsahibəsində deyib.
O bildirib ki, Tehran ABŞ ilə qarşıdurmada hərbi güc baxımından zəif olsa da, asimmetrik müharibə taktikaları sayəsində üstünlük əldə edib.
Qalibaf deyib ki, ABŞ daha böyük hərbi gücə, texnikaya və müharibə təcrübəsinə malikdir, lakin bu amillər nəticəni müəyyənləşdirməyib.
Onun sözlərinə görə, İran dolayı və qeyri-ənənəvi taktikalardan istifadə edərək, rəqibini geri çəkilməyə məcbur edib.
“Biz hərbi güc baxımından ABŞ-dən güclü deyilik, lakin planlaşdırma və strategiya ilə düşməni dəf etdik”, – deyə o vurğulayıb.
Spiker əlavə edib ki, ABŞ-nin əsas problemi resurs çatışmazlığı deyil, strateji səhvlərdir. O bildirib ki, Vaşinqton həm hərbi planlaşdırmada, həm də İran xalqının reaksiyasını qiymətləndirməkdə yanlış hesablamalar edir.
Qalibaf qeyd edib ki, İran yalnız öz şərtləri qəbul edildikdən sonra atəşkəsə razılaşıb və təzyiqlər Tehranın mövqeyini dəyişdirməyib.
Spiker həmçinin İranın silahlı qüvvələrinin hər an hazır vəziyyətdə olduğunu vurğulayıb: “Hətta indi belə müharibə başlaya bilər və biz tam hazırlıqlıyıq”.
Qalibaf ABŞ-nin “America first” siyasətini tənqid edərək, Vaşinqtonun faktiki olaraq İsrailin maraqlarına üstünlük verdiyini iddia edib. Onun sözlərinə görə, Tehran rəqiblərinə etibar etmir və mümkün eskalasiyaya hazırdır.
İran rəsmisi Hörmüz boğazı ətrafında artan gərginliyə də toxunub. O bildirib ki, İran bu strateji su yoluna nəzarət edir və təzyiqlər davam edərsə, gəmiçilik fəaliyyətini məhdudlaşdıra bilər.
Sonrakı hadisələr barədə daha çox məlumat almaq üçün ain.az saytını izləyin.
