Bizimyol portalından verilən məlumata görə, ain.az xəbər yayır.
Ermənistanın Baş naziri Nikol Paşinyan iyun ayında keçiriləcək parlament seçkilərindən sonra ölkənin yeni konstitusiyasının mətninin ictimaiyyətə təqdim oluna biləcəyini istisna etməyib.
Bizimyol.info xəbər verir ki, jurnalistlərin əsas qanunun layihəsinin dərcinə münasibət bildirməsi və onun məzmunu ilə tanış olub-olmaması ilə bağlı sualını cavablandıran Paşinyan bildirib ki, o, yeni konstitusiya layihəsi ilə, şübhəsiz, tanışdır və hətta müəyyən mənada mətn üzərində işləyib.
“Konstitusiyanın dərc olunmasının tərəfdarıyam. Lakin problem ondadır ki, dövlət idarəetmə sistemi ilə bağlı bir neçə prinsipial və mühüm məqam üzrə siyasi və hökumət komandasında bəzi fikir ayrılıqları mövcuddur. Bu mübahisələr həll olunmadan sənədin dərcini istəmirəm. Təəssüf ki, seçkilər sürətlə yaxınlaşır. Planımız bu məsələləri seçkilərə qədər həll edib sənədi yayımlamaqdır. Əgər buna nail ola bilməsək, dərc seçkilərdən sonra baş tutacaq”, – deyə Paşinyan qeyd edib.
Bundan əvvəl baş nazir Ermənistan vətəndaşları ilə “üzvi şəkildə bağlı” olacaq yeni konstitusiyanın qəbulunu siyasi məqsəd kimi irəli sürmüşdü. Müxalifət isə hökumət başçısını əsas qanunun mətnindən Müstəqillik Bəyannaməsinə istinadın çıxarılması ilə bağlı Azərbaycanın növbəti tələbini qəbul etməkdə ittiham edir. Həmin bəyannamədə vaxtilə tanınmamış "Dağlıq Qarabağ respublikası"na istinad yer alır. Ermənistan hökumətinin rəhbəri isə bu ərazini Azərbaycanın tərkib hissəsi kimi tanıyıb. Sənəddə həmçinin 1915-ci ildə Osmanlı imperiyasında baş vermiş "erməni soyqırımı" ilə bağlı qeyd də var.
Rəsmi İrəvan yeni konstitusiyanın Bakının tələbi ilə qəbul edildiyini təkzib edir. Bununla belə, Paşinyan martın 12-də bildirib ki, yeni konstitusiyada Müstəqillik Bəyannaməsinə istinad olmamalıdır, çünki sənəddə “Ermənistan SSR ilə Dağlıq Qarabağın birləşməsi” kimi münaqişəli məntiq əksini tapır. Daha sonra ədliyyə naziri Srbuhi Qalyan yeni konstitusiyanın mətninin hazır olduğunu açıqlayıb və onun yekun formasının müəyyən edilməsinin respublika hökumətinin səlahiyyətində olduğunu vurğulayıb.
Bizimyol.info
Hadisənin gedişatını izləmək üçün ain.az saytında ən son yeniliklərə baxın.
