Azərbaycanda insan alveri ilə bağlı keçirilən son əməliyyatda qadınların iş vədi ilə aldadılaraq istismara məruz qalması faktı bir daha bu üsulun geniş yayıldığını göstərir. Daxili İşlər Nazirliyi tərəfindən açıqlanan məlumatlar preventiv tədbirlərin gücləndirilməsinin vacibliyini ön plana çıxarır.
Bu barədə QHT.az-a müsahibə verən İnsan Alverinə Qarşı Mübarizə Təşkilatının sədri Ramiz Alıyev bildirib ki, insan alverinin ən geniş yayılmış formalarından biri məhz saxta iş vədləri ilə bağlıdır. Bu səbəbdən lisenziyalaşdırılmış işə düzəltmə agentliklərinin fəaliyyətinə nəzarət gücləndirilməli, qeyri-rəsmi vasitəçilik fəaliyyəti isə ciddi şəkildə cəzalandırılmalıdır.
Eyni zamanda vətəndaşların xaricdə işlə təmin olunması prosedurlarının daha şəffaf və əlçatan olması vacibdir. Dövlət məşğulluq xidmətlərinin imkanlarının genişləndirilməsi və risk qrupları üçün maarifləndirici proqramların təşkili bu sahədə əsas addımlar hesab olunur.
Onun sözlərinə görə, bu tədbirlər insan alverinin qarşısının alınmasında mühüm rol oynaya bilər.
