Danimarkanın farmasevtik şirkəti “Novo Nordisk” süni intellekt vasitəsilə dərmanların hazırlanması üçün ChatGPT-nin yaradıcısı “OpenAI” ilə tərəfdaşlıq elan edib. Bu barədə CNBC şirkətin açıqlamasına istinadən məlumat yayıb. “Novo Nordisk” hesab edir ki, bu əməkdaşlıq ona süni intellekti fəaliyyətində daha effektiv tətbiq etməyə imkan verəcək. Məsələn, mürəkkəb məlumat massivlərinin təhlili, perspektivli preparatların müəyyən edilməsi və tədqiqat mərhələsindən dərmanların xəstələrə tətbiqinə keçid müddətinin qısaldılması üçün.
Şirkətin baş direktoru Mayk Dustdar bildirib ki, dünyada milyonlarla insan piylənmə və diabetlə yaşayır və “Novo Nordisk” onların həyatını dəyişə biləcək yeni terapiya üsullarını hələ kəşf etməlidir. Onun sözlərinə görə, süni intellektin gündəlik iş proseslərinə inteqrasiyası şirkətə “əvvəllər mümkün olmayan miqyasda məlumatları təhlil etməyə, əvvəllər görünməyən qanunauyğunluqları aşkar etməyə və hipotezləri daha sürətlə işləməyə” imkan verəcək.
“OpenAI”nin rəhbəri Sem Altman isə qeyd edib ki, süni intellekt “sahələri dəyişdirir” və insanlara “daha yaxşı və daha uzun yaşamağa” kömək edə bilər.
Aprelin 14-də Kopenhagen birjasında ticarət zamanı “Novo Nordisk” səhmləri 4,2% artaraq 248,25 Danimarka kronuna (39,2 dollar) çatıb. Bakı vaxtı ilə saat 14:31-ə artım 3,95%-ə qədər zəifləyib. ABŞ-də Nyu-York Fond Birjasında premarket ticarətdə isə şirkətin səhmləri 3% yüksəlir.
CNBC-nin qeyd etdiyi kimi, farmasevtik şirkətlər əməliyyat fəaliyyətini yaxşılaşdırmaq və prosesləri sürətləndirmək üçün süni intellektdən getdikcə daha çox istifadə edir. Baxmayaraq ki, süni intellekt yeni müalicə üsullarının kəşfinə töhfə verə bilər, ekspertlər hesab edir ki, bu texnologiyanın potensialı hələ tam reallaşdırılmayıb. Bununla belə, süni intellekt xəstələrin və klinik sınaqlar üçün məkanların seçilməsi kimi məsələlərdə şirkətlərə kömək edə bilər.
“Arthur D. Little” konsaltinq şirkətinin tərəfdaşı Ben van der Shaaf CNBC-yə müsahibəsində bildirib ki, süni intellekt hələ dərmanların hazırlanmasının bütün mərhələlərində tətbiq olunmur.
Bu, “Novo Nordisk”in süni intellekt sahəsində ilk tərəfdaşlığı deyil. 2025-ci ildə şirkət tədqiqatların ilkin mərhələlərində və klinik inkişaf prosesində istifadə üçün öz süni intellekt agentlərini və modellərini hazırlamaq niyyətində olduğunu açıqlamışdı. Həmçinin “Novo Nordisk” dərmanların hazırlanmasını sürətləndirmək üçün “Nvidia” ilə “Gefion” superkompüterindən istifadə barədə razılaşma imzalayıb.
