Delsi Rodriqes Vladimir Padrino Lopesi aqrar sektor və torpaq məsələlərinə cavabdeh vəzifəyə gətirib...
Poliqon xəbər verir ki, VTV telekanalı bu barədə məlumat yayıb. Venesuelada prezident səlahiyyətlərini icra edən Delsi Rodriqes ölkənin sabiq müdafiə naziri Vladimir Padrino Lopesi kənd təsərrüfatı və torpaq məsələləri üzrə nazir təyin edib. Məlumata görə, yeni nazirin qarşısında kənd təsərrüfatı istehsalının artırılması və ölkənin yeni iqtisadi strategiyasının həyata keçirilməsi ilə bağlı öhdəliklər qoyulub.
Təyinat Venesuela hakimiyyətinin iqtisadiyyatda qeyri-neft sektorunun rolunu artırmağa çalışdığı bir dövrə təsadüf edir. Rəsmi dairələr hesab edir ki, kənd təsərrüfatının gücləndirilməsi həm daxili ərzaq təminatının yaxşılaşdırılması, həm də iqtisadiyyatın daha dayanıqlı modelə keçidi baxımından mühüm əhəmiyyət daşıyır. Bu baxımdan, uzun illər təhlükəsizlik və müdafiə strukturlarında mühüm postlar tutmuş Vladimir Padrino Lopesə yeni və strateji istiqamətdə məsuliyyət həvalə olunub.
Delsi Rodriqes sosial şəbəkə hesablarında kənd təsərrüfatı nazirliyinə indiyədək rəhbərlik etmiş Xulio Leon Erediaya fəaliyyətinə görə təşəkkür edib. O bildirib ki, Eredia başqa işə keçir. Bununla belə, onun hansı vəzifəyə təyin olunacağı barədə əlavə məlumat verilməyib.
Venesuelada müdafiə naziri postunda dəyişiklik isə martın 19-da baş verib. Həmin tarixdə bu vəzifəyə general-mayor Qustavo Qonsales Lopes gətirilib. O, yanvar ayından etibarən prezident qvardiyasına və Hərbi Əks-Kəşfiyyat Baş İdarəsinə (DGCIM) rəhbərlik edirdi.
Qustavo Qonsales Lopes ABŞ-nin və Avropa İttifaqının sanksiyalar siyahısına daxildir. Ona qarşı insan hüquqlarının pozulması və korrupsiya ittihamları irəli sürülüb. O, daha əvvəl Venesuelanın daxili kəşfiyyat strukturuna rəhbərlik edib, daha sonra isə Delsi Rodriqesin rəhbərliyi altında ölkənin dövlət neft şirkəti olan PDVSA-da çalışıb.
Kadr dəyişiklikləri Venesuela hakimiyyətində həm təhlükəsizlik, həm də iqtisadi idarəetmə sahələrində yenidənqurma prosesinin davam etdiyini göstərir. Xüsusilə kənd təsərrüfatı sektoruna hərbi və siyasi təcrübəyə malik fiqurun gətirilməsi, hökumətin bu sahəni yalnız iqtisadi deyil, həm də strateji məsələ kimi qiymətləndirdiyini ortaya qoyur.
Poliqon.info
