Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Cavid Cəlilovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Abusət Qasımovun sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci bəndi tətbiq edilməklə təqsirləndirilən şəxs Cinayət Məcəlləsinin 128-ci maddəsi ilə cinayət məsuliyyətindən azad edilib və iş üzrə icraata xitam verilib. Onun barəsində qətimkan tədbiri seçilməməsi nəzərə alınıb.
İttihama görə, hadisə 22 yanvar 2025-ci il tarixdə gecə saat 03:30 radələrində təqsirləndirilən şəxsin yaşadığı Abşeron rayonu ərazisində yerləşən ünvanda baş verib.
Belə ki, Cavid Cəlilov qeyri-rəsmi ər-arvad münasibətində olduğu zərərçəkmiş Malikə Nəbiyeva (adı, soyadı şərtidir) ilə şəxsi münasibətlər zəminində mübahisə edib. Mübahisə zərərçəkmiş şəxsin təqsirləndirilən şəxsə işləməməsi və ailəyə maddi dəstək verməməsi ilə bağlı irad bildirməsi nəticəsində yaranıb. Bu zaman Cavid əsəbiləşərək qadına qarşı zor tətbiq edib. O, əvvəlcə Malikənin saçından tutaraq başını yataq taxtına vurub, daha sonra isə əl və yumruq zərbələri ilə onun göz, sifət, baş, boyun və bədəninin müxtəlif nahiyələrinə zərbələr endirib. Nəticədə zərərçəkmiş şəxsə başın ənsə nahiyəsində cırılmış yara, sol alt və üst göz qapaqlarında qançırlar, eləcə də boyunun aşağı hissəsində sıyrıqlar kimi xəsarətlər yetirilib.
Məhkəmə-tibbi ekspertizasının rəyinə əsasən, qeyd olunan xəsarətlər sağlamlığın qısa müddətə pozulmasına səbəb olan yüngül dərəcəli bədən xəsarətləri kimi qiymətləndirilib.
Hadisədən sonra Cavid Cəlilov saxlanılaraq cinayət məsuliyyətinə cəlb edilib.
Kamal Məmmədov
