Bakı, 2 aprel, AZƏRTAC
Zəngəzur dəhlizinin fəaliyyətə başlaması ölkəmiz üçün həm iqtisadi, həm də geosiyasi mövqeyinin güclənməsi baxımından real və ölçülə bilən faydalar gətirəcək. İlk növbədə, dəhliz Azərbaycanın əsas hissəsi ilə Naxçıvanı birbaşa birləşdirərək ölkəni daha effektiv tranzit mərkəzinə çevirəcək.
Bu barədə AZƏRTAC-a açıqlaması zamanı Naxçıvan Muxtar Respublikası Ali Məclisinin deputatı Azad Novruzov deyib.
Deputat qeyd edib ki, bu marşrut vasitəsilə yük daşımalarının vaxtı və xərcləri azalacaq, nəticədə Azərbaycan Şərq–Qərb və Şimal–Cənub ticarət yollarında daha rəqabətli mövqe tutacaq.
“Yəni, bu dəhliz regional ticarətin genişlənməsi baxımından çox əhəmiyyət daşıyacaq. Dəhlizin açılması yerli iqtisadiyyatın canlanmasına ciddi təsir göstərəcək.Yeni nəqliyyat axınları yolboyu yerləşən bölgələrdə ticarət, xidmət və logistika sektorlarının inkişafına təkan verəcək. Xüsusilə sərhəd və tranzit zonalarında kiçik və orta bizneslərin (anbarlar, logistika mərkəzləri, servis xidmətləri və s.) yaranması üçün əhəmiyyətli olacaq. Dəhlizin tikintisi və sonrakı istismarı minlərlə birbaşa və dolayı iş yerləri yaradacaq. Tikinti mərhələsində mühəndislik və fəhlə işləri, fəaliyyətə başladıqdan sonra isə nəqliyyat, gömrük, logistika və xidmət sahələrində məşğulluq artacaq. Dövlətin əsas prioritetlərindən biri olan yeni iş yerlərinin yaradılması üçün əsas bazalardan biri olacaq. Dəhliz infrastrukturun inkişafı üçün də əhəmiyyətlidir. Avtomobil, dəmir yolu, rabitə və enerji infrastrukturu yenilənəcək və genişlənəcək. Bu isə yalnız tranzit üçün deyil, eyni zamanda, yerli əhalinin həyat keyfiyyətinin yüksəlməsi üçün də vacibdir. Dəhliz Naxçıvanın blokada şəraitindən çıxmasına və Azərbaycanın digər bölgələri ilə daha sıx iqtisadi əlaqələr qurmasına imkan yaradacaq”, - deyə Azad Novruzov əlavə edib.
Deputat vurğulayıb ki, bütün bunlar muxtar respublikanın investisiya cəlbediciliyini artıracaq, Naxçıvanın iqtisadi inteqrasiyasını təmin edəcək, Zəngəzur dəhlizi ölkəmizə xarici investisiyaların axınına təkan verəcək: “Beynəlxalq nəqliyyat marşrutlarının üzərində yerləşmək Azərbaycanın strateji əhəmiyyətini artıracaq və logistika, sənaye parkları və istehsal sahələrinə xarici sərmayə axınını stimullaşdıra bilər. Dəhliz regionda əməkdaşlığı gücləndirə və Azərbaycanın nəqliyyat qovşağı kimi rolunu möhkəmləndirəcək. Bu isə uzunmüddətli iqtisadi sabitliyə və tərəfdaşlıqların genişlənməsinə xidmət edir. Buda öz növbəsində geosiyasi və strateji üstünlüklər deməkdir. Bir sözlə Zəngəzur dəhlizi yalnız nəqliyyat layihəsi deyil, həm də iqtisadi inkişaf, regional inteqrasiya və sosial rifah üçün katalizator rolunu oynaya bilər. Düzgün idarəetmə və davamlı investisiya ilə bu layihə Azərbaycanın uzunmüddətli inkişaf strategiyasında mühüm yer tuta bilər”.
