Abşeron rayonunun Saray qəsəbəsində yeni istifadəyə verilmiş dairəvi yol son günlər müşahidə olunan intensiv yağışların sınağından çıxa bilməyib.
NOCOMMENT.az xəbər verir ki, paytaxt və ətraf ərazilərdə yağan güclü yağışlar nəticəsində sözügedən yol qısa müddət ərzində tamamilə su altında qalaraq keçilməz hala düşüb. Müasir infrastruktur layihəsi kimi təqdim olunan yolun bu vəziyyətə düşməsi həm sürücülər, həm də piyadalar üçün böyük çətinliklər yaradıb. Ərazidə drenaj sisteminin və yağış sularını kənarlaşdıracaq kollektorların olmaması suyun hərəkət hissəsində toplanmasına, nəticədə süni gölməçələrin yaranmasına səbəb olub.
Sakinlərin bildirdiyinə görə, yolun tikintisi zamanı relyef xüsusiyyətlərinin düzgün nəzərə alınmaması hər yağışdan sonra eyni mənzərənin təkrarlanmasına yol açır. Hazırda dairəvi yolda nəqliyyatın hərəkəti iflic vəziyyətindədir; bir çox minik avtomobili suyun dərinliyi səbəbindən yolda qalıb, ərazidəki hərəkət isə tamamilə məhdudlaşıb. Bu vəziyyət nəinki nəqliyyatın hərəkətini çətinləşdirir, həm də ətrafdakı yaşayış evlərinə və obyektlərə sızan suyun yaratdığı fəsadlarla sakinləri üz-üzə qoyur. Aidiyyatı qurumların əraziyə müdaxilə etməsi və yığılmış suların nasoslar vasitəsilə təmizlənməsi gözlənilir, lakin sakinlər məsələnin köklü həlli üçün infrastrukturun yenidən nəzərdən keçirilməsini tələb edirlər.
