Interpol tərəfindən axtarılan Xuan Karlos narkotik ticarəti və qətllərlə əlaqələndirilir...
Meksikanın paytaxtı Mexikoda Ekvador mənşəli “Los Lobos” cinayət qruplaşmasının lideri Xuan Karlos (ləqəbi “Lobo Menor”) saxlanılıb.
Poliqon xəbər verir ki, bu barədə Meksikanın daxili işlər naziri Omar Qarsiya Harfuch sosial şəbəkə X-də məlumat yayıb.
Nazirin sözlərinə görə, saxlanılan şəxs narkotik ticarəti, qəsbkarlıq və qətl cinayətləri ilə əlaqədar İnterpol tərəfindən axtarışda olub. Əməliyyat Mexikonun Miguel Hidalgo rayonunun Polanko ərazisində həyata keçirilib.
Bildirilib ki, əməliyyat Meksika hüquq-mühafizə orqanları tərəfindən Kolumbiya və Ekvador təhlükəsizlik qüvvələri ilə birgə koordinasiya şəraitində aparılıb. Saxlanılarkən Xuan Karlosun üzərindən saxta Kolumbiya pasportu aşkar edilib.
Omar Qarsiya Harfuch əlavə edib ki, saxlanılan şəxs 2023-cü ildə Ekvadorda prezidentliyə keçmiş namizəd Fernando Vilyavisensionun qətli ilə bağlı iş üzrə əsas fiqurlardan biridir. Həmin siyasətçi ölkədə korrupsiya və təşkilatlanmış cinayətkarlığı sərt tənqid edirdi.
Kolumbiya prezidenti Qustavo Petro saxlanılan şəxsi “Ekvadorda ən çox axtarılan cinayətkarlardan biri” kimi qiymətləndirib.
Məlumata görə, “Los Lobos” qruplaşması Meksikada fəaliyyət göstərən “Jalisco Yeni Nəsil” kartelinin müttəfiqi hesab olunur. Qrup ölkənin 24 vilayətindən ən azı 15-də aktivdir və şimal sərhədində nəzarəti əlində saxlayaraq Kolumbiyadan gələn kokain axınının böyük hissəsini idarə edir. Bu cinayət şəbəkəsi digər iri qruplaşma olan “Los Choneros” ilə rəqabət aparır.
Analitiklər bildirirlər ki, bu cür yüksək səviyyəli saxlanmalar regionda narkotik ticarəti ilə mübarizədə mühüm addım sayılsa da, təşkilatlanmış cinayətkarlığın köklü şəkildə aradan qaldırılması üçün daha geniş beynəlxalq əməkdaşlıq tələb olunur.
Poliqon.info
