Tehrana qarşı hava hücumları zamanı hərbi və təhlükəsizlik infrastrukturu hədəf alınıb...
Poliqon xəbər verir ki, bu barədə İsrail Müdafiə Qüvvələri rəsmi sosial media hesablarında məlumat yayıb. Bildirilir ki, ötən gün İsrail aviasiyası Tehrana qarşı həyata keçirdiyi hava zərbələri zamanı İranın komanda mərkəzlərini, raket sınaq və yerləşdirmə poliqonlarını, eləcə də digər hərbi infrastrukturu hədəf alıb.
Məlumata əsasən, zərbələr İran İslam İnqilabı Keşikçiləri Korpusunun (SEPAH) təhlükəsizlik bölməsinə aid komanda mərkəzinə endirilib. İsrail tərəfi iddia edir ki, bu struktur ölkə daxilində etirazların yatırılması və ictimai asayişin qorunması ilə məşğul olur.
Bundan əlavə, hücumların daxili təhlükəsizlik qüvvələrinin təchizat və ümumi dəstək bölməsinə məxsus texniki xidmət mərkəzini də əhatə etdiyi bildirilib. İsrail ordusunun açıqlamasında qeyd olunur ki, bu obyektlər İranın təhlükəsizlik aparatının fəaliyyətində mühüm rol oynayır.
İDF-nin verdiyi məlumata görə, hədəflər sırasında həmçinin raketdən müdafiə komanda mərkəzləri və hava hücumundan müdafiə sistemləri də olub. Bu addımın İranın müdafiə imkanlarını zəiflətmək məqsədi daşıdığı ehtimal edilir.
Ekspertlər qeyd edirlər ki, bu cür zərbələr regionda gərginliyin daha da artmasına səbəb ola bilər və tərəflər arasında qarşılıqlı cavab tədbirlərinin güclənməsi riskini yüksəldir. Eyni zamanda, İran tərəfi adətən bu kimi hücumlara sərt reaksiya verir və cavab addımları barədə xəbərdarlıqlar edir.
Poliqon.info
