“Araz-Naxçıvan” Sumqayıta köçür – Rəsmi – ARENA.AZ

Azərbaycan Premyer Liqasında mübarizə aparan “Araz-Naxçıvan” futbol klubu Peşəkar Futbol Liqasına (PFL) rəsmi müraciət edib.

Arena.az bu barədə PFL-in rəsmi saytına istinadən xəbər verir.

Naxçıvan klubu bu komandanın ev oyunlarını keçirdiyi “Dalğa Arena”da əsaslı təmir işlərinin aparılacağını bildirib. Bununla əlaqədar olaraq klub Peşəkar Futbol Liqasına alternativ stadion kimi “Sumqayıt Arena”nı təqdim edib.

Peşəkar Futbol Liqasının qərarına əsasən “Araz-Naxçıvan” 17-19 aprel tarixlərində baş tutacaq “Turan Tovuz” ilə oyundan etibarən mövsümün sonuna qədər ev oyunlarını Sumqayıtda – sözügedən arenada keçirəcək.

Xatırladaq ki, Naxçıvan təmsilçisi Premyer Liqanın cari mövsümündə keçirdiyi 24 oyunda 36 xal toplayıb və 12 iştirakçı arasında 5-ci pillədə qərarlaşıb. Sözügedən komanda keçirdiyi 24 oyunda 10 qələbə qazanıb, 6 heç-heçə edib, 8 məğlubiyyətə üzülüb.