İspaniya hökuməti ABŞ prezidenti Donald Trampın İranla bağlı hücumlarda Vaşinqtonla əməkdaşlıq etmədiyi üçün İspaniya ilə ticarət əlaqələrini kəsməklə bağlı təhdidlərini yeniləməsindən sonra bu açıqlamalardan “heç bir şəkildə qorxmadığını” bildirib.
İspaniyanın xarici işlər naziri Xose Manuel Albares dövlət televiziyası TVE-yə verdiyi müsahibədə Trampın müxtəlif ölkələr və liderlər haqqında tez-tez açıqlamalar verdiyini xatırladaraq deyib:
“Bundan heç bir şəkildə qorxmuruq.”
Albares vurğulayıb ki, İspaniyaya qarşı tək tərəfli addımın atılması mümkün deyil, çünki Avropa İttifaqının ortaq ticarət siyasəti var və bu siyasəti həyata keçirmək səlahiyyəti Brüsselin əlindədir.
Nazir əlavə edib ki, İspaniyanın “Müharibəyə yox” mövqeyi bir çox ölkə və milyonlarla insan tərəfindən dəstəklənir. Onun sözlərinə görə, Madrid İran üzərinə hücumları gücləndirəcək və regionda xaosa səbəb olacaq heç bir addım atmayıb.
Albares İsraildəki diplomatik nümayəndəliyin səviyyəsinin səfirlikdən müvəqqəti işlər vəkili səviyyəsinə endirilməsi ilə bağlı suallara da cavab verib. O bildirib ki, İspaniyanın İsraildəki səfiri altı aydan artıq əvvəl məsləhətləşmələr üçün ölkəyə çağırılıb və buna baxmayaraq, Netanyahunun hökuməti ilə münasibətləri qorumağa çalışıblar. Lakin qarşı tərəfdən müsbət cavab gəlmədiyi üçün Madrid Tel-Əvivdəki diplomatik nümayəndəliyin səviyyəsini İsrailin Madriddəki nümayəndəliyi ilə eyni səviyyəyə endirmək qərarı verib.
