Almaniya 2-ci liqasında (Bundesliqa 2) bazar günü keçirilən qarşılaşmada maskalı bir azarkeş hakimin penalti qərarı üçün meydan kənarındakı ekrana yönəldiyi an Video Köməkçi Hakim (VAR) monitorunun naqilini elektrik yuvasından çıxarıb.
AFN.az xəbər verir ki, hadisə "Preussen Münster"in öz meydanında "Hertha Berlin"ə 2-1 hesabı ilə uduzduğu oyunun ilk hissəsinin sonunda baş verib. VAR-ın müdaxiləsindən sonra hakim Feliks Bikkel epizodu izləmək üçün meydanın kənarına getsə də, monitorun söndüyünü görüb.
"Preussen Münster" klubundan verilən açıqlamada aktiv azarkeş qrupundan olan maskalı bir şəxsin qanunsuz yollarla meydana daxil olduğu və texniki avadanlığın naqilini çıxardığı qeyd edilib. Hakimin ekran qapalı olduğu üçün epizodu izləyə bilməməsi səbəbindən qərar vermə səlahiyyəti Kölndəki mərkəzdə fəaliyyət göstərən VAR hakimi Katrin Rafalskiyə ötürülüb.
Rafalskinin epizodu qayda pozuntusu kimi qiymətləndirməsi ilə Bikkel penalti nöqtəsini göstərib və "Hertha Berlin" bu zərbəni qola çevirib. Aparılan ilkin araşdırmalar hadisənin planlı bir aksiya olduğuna işarə edib. Belə ki, texniki nasazlıqdan qısa müddət sonra tribunada "VAR-ın naqilini çıxarın" yazılmış pankartın açıldığı məlum olub.
Klub rəsmiləri hadisədən təəssüf hissi keçirdiklərini və günahkarın şəxsiyyətinin müəyyənləşdirilməsi üçün çalışdıqlarını bildiriblər. Stadionda təhlükəsizlik tədbirləri artırılıb.
