GlobalInfo portalından alınan məlumata görə, ain.az xəbər verir.
Yaxın Şərqdə baş verən hadisələrə baxanda bir məsələ getdikcə daha çox müzakirə olunur: İsrailin kəşfiyyat xidməti olan Mossad İranın təhlükəsizlik sisteminə nə qədər sızıb?
Son illərdə regionda baş verən bir sıra hadisələr bu sualı daha da aktuallaşdırıb. İranın regional şəbəkəsinə bağlı yüksək səviyyəli fiqurların məqsədli şəkildə aradan götürülməsi Tehranda ciddi narahatlıq yaradıb. Bu əməliyyatların çoxu son dərəcə dəqiq kəşfiyyat məlumatlarına əsaslanırdı və bu da İran daxilində “informasiya sızması” barədə şübhələri gücləndirib.
Məhz bu kontekstdə sosial mediada və müxtəlif saytlarda yeni bir iddia dövr etməyə başlayıb. Guya SEPAH-ın “Qüds” qüvvələrinin komandanı Esmail Qaani İsraildə təhlükəsiz vəziyyətdədir və hətta İsrail kəşfiyyatı ilə əməkdaşlıq edib.
İddialara görə o, HƏMAS lideri Ismail Haniyeh, “Hizbullah” rəhbərləri Hassan Nasrallah və Hashem Safieddine kimi fiqurların aradan götürülməsində rol oynayıb.
Lakin burada mühüm bir məqam var: bu iddiaları təsdiqləyən etibarlı beynəlxalq media mənbələri yoxdur.
Nə Reuters, nə Associated Press, nə də BBC belə bir məlumat yayıb.
Başqa sözlə, Qaaninin Mossad agenti olması və ya İsraildə olması barədə iddialar hazırda təsdiqlənməmiş şayiə səviyyəsindədir.
Bu tip xəbərlərin yayılması isə təsadüfi deyil.
Yaxın Şərqdə uzun illərdir davam edən İran–İsrail qarşıdurması təkcə hərbi və siyasi müstəvidə getmir. Bu mübarizə eyni zamanda böyük kəşfiyyat müharibəsidir.
İsrail uzun illərdir İranın nüvə proqramı və regional şəbəkələri ilə bağlı əməliyyatlar həyata keçirir. İran isə öz növbəsində regionda müxtəlif proksi qüvvələr vasitəsilə təsirini genişləndirməyə çalışır.
Belə şəraitdə informasiya müharibəsi də qarşıdurmanın ayrılmaz hissəsinə çevrilir. Bəzən sosial mediada yayılan sensasion xəbərlər də bu mübarizənin elementinə çevrilir.
Bu baxımdan Qaani barədə yayılan iddialar daha çox informasiya müharibəsinin məhsulu kimi görünür.
Ancaq bu o demək deyil ki, İranın təhlükəsizlik sistemi ciddi problemlərlə üzləşmir.
Son illərdə İsrailin həyata keçirdiyi bir sıra əməliyyatlar göstərir ki, İranın regional şəbəkəsi barədə kifayət qədər dəqiq kəşfiyyat məlumatları mövcuddur. Bu isə Tehran daxilində kəşfiyyat sızması barədə şübhələrin artmasına səbəb olur.
Nəticədə hər uğursuz əməliyyatdan sonra yeni versiyalar ortaya çıxır: hansısa generalın xəyanəti, hansısa komandirin Mossad agenti olması və s.
Bu isə klassik siyasi refleksdir. Tarix göstərir ki, böyük təhlükəsizlik sistemləri ciddi zərbə aldıqda ilk izah çox vaxt daxildə “xəyanət axtarışı” olur.
Yaxın Şərqdə davam edən İran–İsrail qarşıdurması da məhz belə bir mərhələyə daxil olub.
Bu qarşıdurmanın görünən tərəfi raketlər, dronlar və hərbi əməliyyatlardır.
Görünməyən tərəfi isə kəşfiyyat müharibəsidir…
Elbəyi Həsənli
Sürix
Hadisənin gedişatını izləmək üçün ain.az saytında ən son yeniliklərə baxın.
