Uzun illərdir ki, etibarlı tərəfdaşlıq, ortaq maraqlar, qarşılıqlı hörmət və suverenliyə prinsipial yanaşma əsasında qurulan və bu gün uğurla davam edən Azərbaycan - Serbiya münasibətləri ölkələrimizin qarşısında necə parlaq gələcəyin olduğunun göstəricisidir.

Xüsusi qeyd etmək lazımdır ki, Azərbaycan Prezidenti İlham Əliyev ilə Serbiya Prezidenti Aleksandar Vuçiç arasında formalaşmış şəxsi dostluq və qarşılıqlı etimad münasibətlərin əsas dayaqlarındandır. Dövlət başçıları mütəmadi görüşlər və yüksək səviyyəli səfərlərlə əməkdaşlığı dinamik saxlayırlar. Prezidentlərin mətbuata bəyanatları zamanı səsləndirilən fikirlər açıq mesaj idi: Azərbaycan və Serbiya əlaqələri formal diplomatik çərçivəni çoxdan geridə qoyub. Bu münasibətlər artıq siyasi etimad, iqtisadi maraq və strateji planlaşdırma üzərində qurulub. Serbiya Respublikasının Prezidenti Aleksandar Vuçiç mətbuata bəyanatında bildirdi ki,” Mən Azərbaycan xalqına, şəxsən Sizə möhtərəm cənab Prezident, böyük ehtiramımı ifadə etmək istəyirəm. Həmçinin Serbiya xalqı qarşısında və əlbəttə, Azərbaycan xalqı qarşısında söyləmək istəyirəm ki, hər dəfə Sizinlə danışanda çox şey öyrənirəm, bir çox məsələləri təcrübəli dövlət xadimi, həqiqi liderin fərqli baxış bucağından müşahidə etməyə müvəffəq oluram. Buna görə hər zaman öz biliyinizi mənimlə paylaşdığınıza, mənim ölkəmin, rəhbərlik etdiyim ölkənin çox yaxşı mətləblər öyrənməli olduğu bizimlə belə əlaqələr qurduğunuza görə Sizə təşəkkür edirəm”.

Prezident İlham Əliyev Serbiya Respublikasına cari ilin 15 fevral tarixdə səfəri zamanı verdiyi bəyanatında qeyd etdi ki, bu gün Serbiya-Azərbaycan Strateji Şurasının birinci iclasında bir çox məsələlər müzakirə edildi. Bizim gələcək üçün də açıq-aydın planlarımız var. Həm siyasi, həm iqtisadi, həm də energetika sahəsində əlaqələrimizi daha da gücləndirmək, beynəlxalq platformalarda, beynəlxalq təşkilatlar çərçivəsində bundan sonra da bir-birimizin ərazi bütövlüyünü və suverenliyini dəstəkləmək, birgə sərmayə layihələrini həyata keçirmək, energetika və nəqliyyat sahələrində yeni yaranmış imkanlardan yararlanaraq, daha irəliyə baxaraq çox güclü bir sinergiya yaratmaqdır.

Azərbaycan Serbiyaya böyük həcmdə sərmayə qoymağa hazırdır. Prezident Vuçiç artıq birgə inşa ediləcək elektrik stansiyasının gələcəyinə toxundu. Prezident qeyd etdiyi kimi, biz qərara gəldik ki, bu məsələni nəzarət altında saxlayacağıq. Bu elektrik stansiyasının yaradılması prosesi məhz Serbiyada mövcud olan investisiya - sərmayə imkanlarına söykənir. Çünki əgər investisiya iqlimi müsbət olmasaydı, Serbiya xarici investorlar üçün o qədər də cəlbedici olmazdı. Elektrik stansiyalarının tikintisi və yenidən qurulması, onların reabilitasiyası hər bir ölkənin gələcək inkişafını təmin edir. Xüsusilə təbii resursları olmayan ölkələr bir çox hallarda asılı vəziyyətə düşürlər. Ona görə daxili enerji, istehsalat gücünün mövcudluğu hər bir ölkənin enerji təhlükəsizliyini təmin edir və bu layihənin həyata keçirilməsində mən Prezident Vuçiçin xüsusi rolunu qeyd etmək istərdim.

Ölkə Başçısı qeyd etdi ki, mənim rəsmi səfərimin nəticələri özünü çox gözlətməyəcək. Biz yaxın gələcəkdə yenə də bir-birimizlə görüşəcəyik. Mən Prezident Vuçiçi və Serbiya nümayəndə heyətinin üzvlərini Azərbaycana dəvət etmişəm. Əminəm ki, biz bu il bir neçə dəfə görüşəcəyik - həm Azərbaycanda, həm də ola bilər, mən yenə Serbiyaya gəlim. Çünki mən və əminəm ki, Azərbaycan nümayəndə heyəti burada özlərini evindəki kimi hiss edirlər. Mən dəfələrlə Serbiyada olmuşam və Prezident Vuçiçin rəhbərliyi ilə Serbiyada gedən inkişafı öz gözlərimlə görürəm. Buna görə bir daha serbiyalı dostlarımızı ürəkdən təbrik etmək istəyirəm və Prezident Vuçiçin şüarına da qoşuluram. Yaşasın Serbiya! Yaşasın Azərbaycan! Yaşasın Serbiya-Azərbaycan dostluğu!

Eyni zamanda Belqradda Azərbaycan Respublikasının Prezidenti İlham Əliyevin və Serbiya Respublikasının Prezidenti Aleksandar Vuçiçin iştirakı ilə Azərbaycan-Serbiya sənədlərinin mübadiləsi mərasimi olub.

Əminliklə söyləmək olar ki, Azərbaycan Respublikası ilə Serbiya Respublikası arasındakı qarşılıqlı hörmətə əsaslanan, regional sabitliyə töhfə verən və uzunmüddətli strateji planlara söykənən tərəfdaşlıq modeli davamlı və perspektivli olacaqdır. Azərbaycan - Serbiya münasibətləri gələcək illərdə də yeni layihələr, yeni təşəbbüslər və yeni uğurlarla zənginləşəcəkdir.

Paşa Hadıyev
YAP Qazax rayon təşkilatının sədr müavini

• Azərbaycan
• Dostluq
• Serbiya
• Paşa Hadıyev