Gəncə Apellyasiya Məhkəməsində qəsdən sağlamlığa az ağır zərər vurmada təqsirləndirilən Kamran Budaqovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Salman Hüseynovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib. “Konstutisiya və Suverenlik İli münasibətilə amnistiya elan edilməsi haqqında” Milli Məclisin 19 dekabr 2025-ci il tarixli qərarının 2.3, 5.2.2 və 5.3-cü bəndlərinə əsasən təqsirləndirilən şəxs Şəmkir Rayon Məhkəməsinin hökmü ilə ona təyin olunmuş 1 il 2 ay müddətə azadlıqdan məhrumetmə cəzasının, həmin Amnistiya aktı qüvvəyə mindiyi günədək 1 ildən artıq olmayan çəkilməmiş hissəsindən azad olunub. Gəncə Apellyasiya Məhkəməsinin qərarı ilə Kamran Budaqov barəsində seçilmiş ev dustaqlığı qətimkan tədbiri ləğv edilib.
İttihama görə, Kamran Budaqov 19 oktyabr 2024-cü il tarixdə saat 17 radələrində alkoqol sərxoşluğu vəziyyətində yaşadığı Şəmkir rayonu, Zəyəm-Cırdaxan kəndində evinin yerləşdiyi küçədə zərərçəkmiş Qulam Bədəlovu (adı, soyadı şərtidir) israrla həmin yerə çağırıb. Zərərçəkmişin ona tanışının ailəsini dağıtmasına görə irad bildirməsini bəhanə edən təqsirləndirilən şəxs mübahisə yaradaraq ictimai qaydanı kobud şəkildə pozub.
İstintaq materiallarına əsasən, hadisə zamanı o, küçədə ictimai asayişin pozulmasına, vətəndaşların hüquq və qanuni mənafelərinin toxunulmazlığına təhlükə və həyəcan yaranmasına səbəb olan hərəkətlər edib. Mübahisə zamanı Kamran Qulama əl zərbələri ilə sifət, baş və bədən nahiyələrindən ardıcıl şəkildə xəsarətlər yetirib. Məhkəmə-tibbi ekspertizasının rəyinə əsasən, zərərçəkmişə alt sol çənə bucağı nahiyəsində şişkinlik və alt çənə sümüyünün sol şaxəsinin yerdəyişməyən sınığı qeydə alınıb ki, bu da sağlamlığın uzun müddətə pozulmasına səbəb olan az ağır zərər kimi qiymətləndirilib. Bundan əlavə, üst dodağın selikli qişasının sağ hissəsində əzilmiş səthi yara və sol diz oynağının bayır səthində qançır müəyyən edilib. Həmin xəsarətlər sağlamlığa zərər vurmadığı üçün dərəcələri təyin edilməyib.
Şəmkir Rayon Məhkəməsinin hökmü ilə təqsirləndirilən şəxs 1 il 1 ay 28 gün müddətinə azadlıqdan məhrum edilmişdi. Birinci instansiya məhkəməsinin hökmündən narazı qalan Kamran Budaqovun müdafiəçisi apellyasiya şikayəti verərək hökmün ləğv edilməsini istəyib.
Kamal Məmmədov
