Ermənistan prezidenti ABŞ vitse-prezidenti ilə əməkdaşlıq perspektivlərini müzakirə edib.
KONKRET.az xəbər verir ki, Ermənistan prezidenti Vaaqn Xaçatryan rəsmi səfərlə İrəvanda olan ABŞ-ın vitse-prezidenti Cey Di Vens ilə görüş keçirib.
Məlumata görə, görüş zamanı Vaaqn Xaçatryan ABŞ nümayəndə heyətinin səfərini müsbət qiymətləndirib və bunun iki ölkə arasında münasibətlərin hazırkı yüksək səviyyəsinin göstəricisi olduğunu vurğulayıb. Bu barədə məlumatı Armenpress agentliyi yayıb.
Ermənistan prezidenti regionda sabitliyin və uzunmüddətli sülhün təmin edilməsinin vacibliyinə diqqət çəkib. O, bu istiqamətdə ABŞ prezidenti Donald Trampın rolunu xüsusi qeyd edib.
Tərəflər həmçinin bildiriblər ki, yüksək səviyyəli qarşılıqlı səfərlər siyasi dialoqun dərinləşməsinə, əməkdaşlığın genişlənməsinə və ikitərəfli münasibətlərin möhkəmlənməsinə mühüm töhfə verir.
Görüşdə gələcək əməkdaşlıq imkanları və regional proseslər ətrafında da fikir mübadiləsi aparılıb.
Natiq Səlim,
KONKRET.az
