Kinder Surprise (“Kinder Sürpriz” – italyan dilində sorpresa “sürpriz” deməkdir) sadə bir şokolad yumurtası deyil, o, dünya uşaq mədəniyyətinin populyar simvoluna çevrilib.
Azia.az KONKRET.az-a istinadən sözügedən yumurta haqda araşdırmanı təqdim edir.
Məhsul ilk dəfə 1974‑cü ildə İtaliyada qida sənayesində inqilabi ideya hesab edilən konsepsiya ilə tanış edilib və bu günə qədər 30 milyarddan çox satış həyata keçib.
M.Ferrero İtaliyada, Alba şəhərində doğulub və “Ferrero” şirkətini idarə edib. Məhsulun adı alman dilində “Kinder”, yəni “uşaqlar” deməkdir. Bu ad beynəlxalq bazara uyğun olsun və Avropada uşaqlar üçün cazibədar görünsün deyə seçilmişdi.
“Kinder Surprise” konsepsiyasının kökü ənənəvi italyan Pasxa bayramı adətinə əsaslanır: uşaqlara şokolad yumurtalar verilir və bu yumurtalar içərisində müxtəlif sürprizlər olurdu.
Bu ideyanı gündəlik həyat üçün uyğun məhsula çevirmək istəyən “Ferrero” şirkətinin sahibi Mikele Ferrero bu şokolad yumurtasını yaradıb.
Məqsəd isə sadə idi: şokoladın ləzzəti ilə oyuncaq sürprizini birləşdirərək uşaqlarda sevinc və gözlənilməz həyəcan yaratmaq.
Beləliklə, “Kinder Surprise” 1974‑cü ildə satışa çıxarıldı. sərt şokolad qabığında gizlədilmiş plastik kapsula (yumurta sarısına bənzəyən sarı konteyner) içində kiçik oyuncaq yerləşirdi. Bu oyuncaq həm kifayət qədər sadə idi ki, uşaqlar üçün əyləncəli olsun, həm də hər yumurtada fərqli bir sürpriz təqdim edirdi.
Bu oyuncaqlar tez‑tez qurulması tələb olunan parçalarla gəlir və bununla da uşaqlarda həm səbr, həm də yaradıcılıq hissi oyadır.
Sürpriz oyuncağın nə olacağını əvvəlcədən bilmək olmurdu, bu da hər dəfə yeni kəşf həyəcanı yaradırdı.
Təxminən, hər il 100‑dən çox fərqli oyuncaq modeli təqdim edilir və 2016‑cı ilə qədər 12 000‑dən çox müxtəlif sürpriz hazırlanıb.
“Kinder”in dünya fenomeninə çevrilməsi
“Kinder Surprise” qısa müddətdə İtaliyanın sərhədlərini aşdı və Avropada uşaqların sevimli şokolad yumurtasına çevrildi. Əsasən, Almaniya, Rusiya və Birləşmiş Krallıq bazarlarında xüsusilə populyardır.
Bu məhsul həm də böyüklər arasında kolleksiya əşyasına çevrilib. Müəyyən tematik seriyalar, nadir sürprizlər və xüsusi kolleksiya paketləri toplayanlar üçün bir hobbiyə olub.
“Ferrero” şirkəti öz missiyasını belə ifadə edir: “Kinder” uşaqlarla valideynlər arasında birlikdə oyun və xoş xatirələr yaratmaq, hər yumurta vasitəsilə gündəlik xoş anlar bəxş etməkdir.
Bu qədər uğura baxmayaraq, “Kinder Surprise” bəzi ölkələrdə qanuni məhdudiyyətlərlə də qarşılaşıb. Məsələn, ABŞ‑da Federal Qida, Dərman və Kosmetika Aktı səbəbindən içərisində oyuncaq gizlədilmiş qida məhsullarının satışı qadağandır, çünki təhlükəli kiçik hissələrin boğulma riskini artırdığı iddia edilir. Buna görə orada bu tip şokolad yumurtalar rəsmi olaraq satışa çıxarılmır.
Bu məhdudiyyətlərdən sonra “Ferrero” 2001‑ci ildə “Kinder Joy” adlı yumurtanı bazara çıxardı.
Belə ki, bu versiyada şokolad və oyuncaq ayrı bölmələrdə verilir, beləliklə uşaq təhlükəsizliyi qaydalarına uyğun olur.
“Kinder Surprise” artıq yarım əsrdən çoxdur ki, dünya bazarında mövcuddur və hər gün milyonlarla yumurta istehlak olunur.
“Ferrero” şirkəti hər 10 ildə bir “Kinder Surprise” üçün xüsusi limitli seriya buraxır. Bu seriyalar, adətən, dizayn və nadir fiqurlarla seçilir. Məsələn 50 illik yubiley münasibətilə istehsal olunan qızıl yumurta seriyası bunlardan biridir. Hər yumurta xüsusi qızılı rəngdə hazırlanmış və içərisində nadir sürprizlər yerləşdirilmişdi. Bu limitli seriyadan sadəcə bir neçə min satışa çıxarılmışdı. Kolleksiyaçılar bu nadir yumurtaları hələ də onlayn platformalarda tapmağa çalışırlar.
Bu gün “Kinder” yalnız uşaqlar üçün əyləncə deyil, həm də kolleksiya bazarında yüksək dəyərli əşya halına gəlib. 1990‑cı illərin seriyaları isə xüsusilə məşhurdur, həmin illərdə çıxarılan kiçik oyuncaq fiqurlar, heyvanlar və populyar cizgi filmlərinin qəhrəman modelləri indi yüzlərlə, bəzən minlərlə dollara satılır.
Müasir kolleksionerlər bu nadir oyuncaqları auksionlardan, onlayn platformalardan əldə edirlər. Kolleksionerlər deyir ki, xüsusilə tam açılmamış, istifadə olunmamış kapsullarla birlikdə olan oyuncaq modellər bazarda ən yüksək qiymətə malikdir.
Bəzi hallarda 1980‑ci və 1990‑cı illərin “Kinder Surprise” seriyaları antik əşya kimi qiymətləndirilir və nadir hallarda tapıla bilən modellər hətta 5000 ABŞ dollarına qədər alıcı tapa bilir.\\“Yeni Sabah”
