Dünyanın ən böyük üç texnologiya şirkəti — “Meta” , “ByteDance” və “Google” (müvafiq olaraq “Instagram”, “TikTok” və “YouTube”) uşaqları qəsdən öz platformalarına aludə etmələri və onlara zərər vermələri iddiaları ilə bağlı Los-Ancelesdə səs-küylü məhkəmə prosesi ilə üzləşirlər.
Aznews.az bu barədə xarici KİV-ə istinadən xəbər verir.
Los-Anceles dairə Məhkəməsində münsiflər heyətinin seçimi bu həftə başlayır. Bu, şirkətlərin ilk dəfə öz mövqelərini andlı münsiflər qarşısında müdafiə edəcəyi prosesdir və nəticə onların biznes fəaliyyətinə, eləcə də platformalarda uşaqlarla bağlı siyasətlərinə ciddi təsir göstərə bilər.
Seçim prosesinin ən azı bir neçə gün davam edəcəyi gözlənilir. Cümə axşamınadək hər gün 75 andlı münsif olmağa namizədin dindirilməsi planlaşdırılır. İddiada adı keçən dördüncü şirkət — “Snapchat” platformasının sahibi olan “Snap Inc.” ötən həftə məbləği açıqlanmayan razılaşma yolu ilə işi dinc şəkildə yoluna qoyub.
İşin mərkəzində yalnız “KGM” baş hərfləri ilə tanıdılan 19 yaşlı bir şəxs dayanır. Onun qaldırdığı iddia sosial media şirkətlərinə qarşı açılmış minlərlə oxşar məhkəmə iddiasının gələcək taleyini müəyyən edə və presedentə çevrilə bilər.
