Bəzi ölkə və bölgələrdə dövlət və yerli hakimiyyət orqanları müəyyən şərtlərlə sakinlərə birbaşa pul verir. Metbuat.az-ın məlumatına görə, bu ödənişlər əsasən sosial dəstək, təbii sərvət gəlirləri və ya əhali azalmasının qarşısını almaq üçün tətbiq edilir. ABŞ‑nin Alaska ştatında sakinlər “Permanent Fund Dividend” proqramı çərçivəsində təxminən 1 000–1 700 dollar (1 700–2 890 manat) arasında ödəniş alırlar və pul almaq üçün ştatda rəsmi yaşamaq tələb olunur. Makao (Çin) sakinlərinə illik “Wealth Partaking Scheme” çərçivəsində daimi sakinlər 10 000 pataka (təxminən 2 700 manat), qeyri‑daimi sakinlər isə 6 000 pataka (təxminən 1 620 manat) alırlar. Səudiyyə Ərəbistanında vətəndaşlara “Citizen’s Account” proqramı üzrə aylıq yardım verilir və bu məbləğ orta hesabla 300–1 200 Səudiyyə rialı (təxminən 143–573 manat) arasında dəyişir. Şveytsariyanın Albinen kəndində yeni köçənlərə təşviq olaraq yetkin sakinlər 20 000 İsveçrə frankı (təxminən 43 120 manat), uşaqlar isə 10 000 frank (təxminən 21 560 manat) alırlar. Burada şərt odur ki, köç edənlər ən azı 10 il kənddə yaşasınlar. Yunanıstanın Antikitera adasında yeni ailələr üçün köç təşviqi proqramı var və bura köç edənlər 3 il ərzində ümumilikdə təxminən 24 000 avro (təxminən 40 800 manat) maddi yardım alırlar. İtaliyanın bəzi kənd və bölgələrində yeni sakinlər üçün müxtəlif yaşamaq və ev təşviqləri mövcuddur. Bu proqramlarda məbləğ təxminən 5 000–30 000 avro (təxminən 8 500–51 000 manat) arasında dəyişir. Yaponiyada kənd yerlərinə köç edən ailələr üçün dövlət və bələdiyyələr tərəfindən ayrılan maddi dəstək təxminən 1–3 milyon yen (təxminən 12 600–37 800 manat) səviyyəsindədir və bölgədən asılı olaraq dəyişir. Qeyd edək ki, bu ödənişlər sabit maaş xarakteri daşımır və çox vaxt müəyyən şərtlər, müddət və yaşayış tələbləri ilə verilir. Sevinc İbrahimzadə / Metbuat.az

• Sosial Dəstək
• Təbiət Sərvətləri
• Əhali Azalması
• Pul Ödənişi