Xocalı soyqırımının canlı şahidi, litvalı jurnalist Ričardas Lapaitisin sözlərinə görə, erməni silahlı dəstələrinin azərbaycanlılara qarşı törətdikləri vəhşiliklər XX əsr Avropasında baş vermiş faşist cinayətlərini belə geridə qoyurdu.
NOCOMMENT.az xəbər verir ki, Lapaitis bildirib ki, onun müşahidələrinə əsasən, ermənilər onilliklər boyu Azərbaycanı daxildən parçalamağa çalışan bir “şiş, yara” kimi fəaliyyət göstəriblər:
“Bu, onilliklər ərzində Azərbaycanı içəridən yeyən bir şiş, bir yara idi. 1828-ci ildən başlayaraq ölkənin altını qazıyan düşmən. Evın içində yaşayan düşmən”.
Gördüklərini unutmaq mümkün deyil
Litvalı jurnalist Xocalıda öz gözləri ilə gördüklərini dəhşət hissi ilə xatırlayır: qətlə yetirilmiş qadınlar, dərisi soyulmuş başlar, kəsilmiş qulaqlar, valideynlərinin cəsədlərinin yanında öldürülmüş gənc qızlar.
Onun sözlərinə görə, dişləri sındırılmış meyitlər də olub – xüsusilə qızıl dişləri olan insanların meyitlərindən qızıl taclar çıxarılıb. Lapaitis bu mənzərələri nasistlərin ölüm düşərgələri ilə müqayisə edir.
“Bu, nasist ölüm düşərgələrini xatırladırdı. Amma bunlar XX əsrin ortalarında Avropada yox, Azərbaycan torpağında baş verirdi”.
“Bu, faşizmdən də ağır vəhşilik idi”
Lapaitis yeni doğulmuş körpələrin qətlə yetirilməsindən, qadınların zorlanmasından, əsirlərə qarşı ağlasığmaz işgəncələrdən danışır. Onun fikrincə, Xocalıda törədilənlər sadəcə müharibə cinayəti deyil, insanlığa qarşı cinayət idi və qəddarlıq səviyyəsinə görə faşizmi belə geridə qoyurdu.
Xüsusilə əsirlikdə yaşananları sözlə ifadə etməyin çətin olduğunu vurğulayan jurnalist bədəni bıçaqlarla doğranmış bir qızın xatirəsini yada salır. O, həmin qızın fotosunu Strasburqda dolu bir zalda nümayiş etdirdiyini deyir.
Serj Sarkisyan açıq şəkildə ittiham olunur
Ričardas Lapaitis Ermənistanın keçmiş prezidenti Serj Sarkisyanı birbaşa hərbi cinayətlərdə və azərbaycanlılara qarşı etnik təmizləmədə ittiham edir. Onun sözlərinə görə, Sarkisyanın adı Xocalı faciəsində cəlladlar sırasında xüsusi yer tutur.
“Mən cəlladların adlarını bacardığım hər yerdə çəkmişəm və çəkməyə davam edəcəyəm”, – deyə Lapaitis bildirib.
Onun mövqeyi dəyişməzdir: Serj Sarkisyan hərbi cinayətkardır və mütləq müttəhimlər kürsüsündə əyləşməlidir.
“Mən inanıram ki, ədalət günü mütləq gələcək”, – deyə litvalı jurnalist vurğulayıb.
