2022-2026-cı illərdə sosial-iqtisadi inkişaf strategiyası və Böyük Qayıdışa dair I Dövlət Proqramının uğurlu icrası növbəti mərhələnin əsas çağırışlarını müəyyən edib.
"Operativ Məlumat Mərkəzi-OMM"-in xəbərinə görə, bunu bu gün parlamentin plenar iclasında çıxış edən Baş nazir Əli Əsədov bildirib.
Baş nazirin sözlərinə görə, artıq 2027-2030-cu illəri əhatə edəcək yeni strategiya və Böyük Qayıdışa dair II Dövlət Proqramı hazırlanır. 2026-2029-cu illərdə dövlət xərclərinin prioritet istiqamətləri dayanıqlı iqtisadi artım, işğaldan azad olunmuş ərazilərdə yenidənqurma, müdafiə və sosial təminat, təhsil, səhiyyə, təmiz ətraf mühit və yaşıl artım olacaq.
2026-cı ildə icmal büdcənin gəlirləri təqribən 45 milyard manat, xərcləri 48,8 milyard manat proqnozlaşdırılır, büdcə kəsirinin ÜDM-ə nisbəti 2,9 faiz təşkil edəcək. Qeyri-neft sektorunda ÜDM-in real artım tempi 5 faiz proqnozlaşdırılır.
Əsədov qeyd edib ki, Azərbaycan iqtisadiyyatı texnoloji modernləşmə və rəqəmsal transformasiya mərhələsinə daxil olub və orta müddətli dövrdə aparıcı qüvvə qeyri-neft sektoru olacaq. 2022-ci ildə ÜDM-in 52 faizini qeyri-neft sektoru təşkil edirdisə, 2025-ci ildə bu göstərici 72 faizə, 2029-cu ildə isə 80 faizdən artıq olacaq.
Afət Ziyadqızı
