Azərbaycan siyasi həyatında uzun illər boyu görünməyən, lakin hər yerdə izi olan bir şəbəkənin mərkəzində Ramiz Mehdiyevin dayandığı artıq sirr deyil. Dövlətə xəyanət və bir sıra ağır ittihamlarla üz-üzə qalan sabiq PA rəhbərinin təkcə hakimiyyət içində deyil, müxalifət daxilində də “kadr yetişdirdiyi” haqda məlumatlar pərdəarxası siyasi oyunların həcmini göz önünə sərir. Son günlər yayılan faktlar isə göstərir ki, Mehdiyevin qurduğu bu sxemin ən önəmli fiqurlarından biri radikal müxalifət mənsubları – Əli Kərimli və Gültəkin Hacıbəyli olub.
Gültəkin Hacıbəylinin bir zamanlar Ramiz Mehdiyevi göylərə qaldıran fikirləri, onun “şəxsiyyətinə heyranlıqla yanaşması” bu gün özünü müxalifətin barışmaz siması kimi təqdim edən şəxsin keçmişinə işıq salır. Bugünkü ritorikasına baxanda həmin sözlərin müəllifinin o olduğuna inanmaq çətin görünür, amma məhz o, Mehdiyevin “nüfuzu və iradəsi olmasaydı, ölkə daha pis proseslərlə üzləşərdi” deyə bəyanat verən adamdır. Sonradan müxalifət cəbhəsinə keçidi isə bəzi dairələrin iddia etdiyi kimi ideoloji dönüş yox, Ramiz Mehdiyevin bitkin planının tərkib hissəsi olub.
Bu planın digər mühüm parçası Əli Kərimli idi.
90-cı illərin sonlarından Mehdiyevin siyasi orbitinə daxil olduğu bildirilən Kərimli həmin dövrdən etibarən xüsusi “vasitəçi xətti” ilə təlimat alıb. Prezident Administrasiyasının sabiq şöbə müdiri Əli Həsənovun bu əlaqənin qurulmasında əsas fiqur olduğu haqda məlumatlar uzun illərdir siyasi çevrələrdə müzakirə olunur. Görüşlərin restoran masalarında başladığı, sonrakı mərhələdə təlimatların artıq qapalı kanallarla ötürüldüyü bildirilir. Bu təlimatların mahiyyəti isə eyni idi: müntəzəm mitinqlərin keçirilməsi, gərginlik yaratmaq, sosial şəbəkələrdə və mediada hakimiyyətə qarşı ittihamların şiddətləndirilməsi və beynəlxalq tədbirlər zamanı aksiyalara xüsusi aktivlik verilməsi. Məqsəd həm müxalifəti “güclü və təhlükəli” göstərmək, həm də Mehdiyevin özünü hakimiyyəti “xarici və daxili təhdidlərdən qoruyan əsas fiqur” kimi təqdim etmək idi.
Maraqlıdır ki, Mehdiyev və ətrafı hakimiyyətdən uzaqlaşdırıldıqdan dərhal sonra radikal müxalifətin fəaliyyətinin zəifləməsi, mitinqlərin dayanması, hətta sosial şəbəkə ritorikasının belə aşağı düşməsi hadisələrin təsadüfi olmadığını nümayiş etdirdi. Bu, illərlə “ideoloji mübarizə” kimi təqdim olunan proseslərin əslində kabinetlərdə yazılan ssenarilərin icrası olduğunu ortaya qoydu.
Müxalifətin içində Mehdiyevin ən çox güvəndiyi şəxslərdən biri kimi göstərilən Gültəkin Hacıbəylinin siyasi portreti də bugünlərdə yayılan faktlarla tamamilə aydınlaşır. Deputat olduğu illərdə Goranboyda əldə etdiyi torpaq sahələri, tikdirdiyi evlər, biznes obyektləri və geniş mülk paketlərinin hamısının Mehdiyevin himayəsi ilə formalaşdığı deyilir. Rayon sakinlərinin sözlərinə görə, Hacıbəyli deputat mandatını şəxsi biznesini böyütmək üçün istifadə edib, ona ayrılan torpaq sahələrinin böyük hissəsini satıb, qalanında isə özünə geniş mülk salıb. 80 sotluq ərazinin hissələrə bölünməsi, Xanqərvənddə pay torpaqlarına bağ evi tikdirməsi, Nadirkənddə 5 hektarlıq əraziyə sahib olması, Yuxarı Ağcakənddə daş-gips karxanasına nəzarəti – bütün bunlar onun “qəddar korrupsiya ilə mübarizə aparan” obrazıyla heç bir şəkildə üst-üstə düşmür.
Bu faktlar həm də göstərir ki, Gültəkin Hacıbəylinin müxalifətçiliyə keçidi onun şəxsi ideoloji seçimi yox, Mehdiyevin uzunmüddətli planının davamı olub. Əli Kərimli ilə eyni siyasi xəttə keçməsi, Milli Şuraya qoşulması, radikal ritorikanın önündə dayanması məhz bu çərçivədə baş verib. Müxalifət daxilində süni gərginlik yaratmaq, hakimiyyətə qarşı təzyiq görüntüsü formalaşdırmaq və paralel şəkildə Mehdiyevin öz mövqelərini qorumaq üçün istifadə etdiyi “kölgə mexanizmi” fəaliyyət göstərirdi.
Bu gün Mehdiyevin siyasi şəbəkəsinin çökməsi ilə bir çox faktlar ard-arda üzə çıxır. Uzun illər ideoloji savaş kimi göstərilən proseslərin arxasında şəxsi maraqlar, torpaq alveri, maliyyə dəstəyi və kabinet oyunları dayanırmış. Bu ifşa həm radikal müxalifətin indiki iddialarının nə qədər boş olduğunu, həm də onların keçmiş siyasi sponsorunun hələ də davam edən təsir izlərini bir daha göstərir. /Musavat.com/
