Tbilisi, 25 noyabr, AZƏRTAC
Beynəlxalq Xizək və Snoubord Federasiyası bu il dekabrın 20-21-də Gürcüstanın Bakuriani bölgəsində keçirilməsi planlaşdırılan “Freestyle və Dual Moguls” üzrə Dünya Kubokunu ləğv edib.
AZƏRTAC xəbər verir ki, bu barədə Gürcüstan Xizək Federasiyası məlumat yayıb.
Bildirilir ki, Bakurianidə keçirilməli olan yarış idmanın inkişafı üzrə beşillik dövlət planında qeyd olunan prioritetlərin dəyişməsi səbəbindən ləğv edilib. Hazırda alternativ yerlər nəzərdən keçirilir.
Xizək Federasiyasının rəhbəri Zurab Kostava bildirib ki, dövlətin beşillik inkişaf planı var idi: “Dekabrda keçirilməsi planlaşdırılan Dünya Kubokunda yalnız bir idman növü üzrə idmançılarımızın iştirak etdiyini nəzərə alaraq, dövlət öz prioritetlərini dəyişdi”.
“Bu, qeyri-adi bir şey deyil. Hər il ən azı 15 yarış - ümumi yarışların isə 10 faizi ləğv olunur”, - deyə Kostava jurnalistlərə bildirib.
Gürcüstanın xizək kurortlarında qış turnirlərinin 2027-ci ildə bərpası planlaşdırılır.
AZƏRTAC-ın xüsusi müxbiri
Tbilisi
