Ukraynanı şoka salan 28 maddəlik sülh planı rus dilindən tərcümə olunub…
Poliqon xəbər verir ki, Bloomberg Agentliyinin məlumatına görə, Vaşinqton və Moskva arasında aparılan gizli razılaşmalar nəticəsində hazırlanan sənəd Kiyevdə ciddi narahatlıq yaradıb.
Məlumata əsasən, sənədin hazırlanması ötən ay Mayamidə keçirilən gizli görüş zamanı başlayıb. ABŞ-nin xüsusi nümayəndəsi Stiv Uitkoff və rusiyalı emissar Kirill Dmitriyev 28 maddəlik planı məhz həmin görüşdə formalaşdırıblar. Görüşdə ABŞ keçmiş prezidentinin kürəkəni Cared Kuşnerin də iştirakı xüsusi diqqət çəkib.
Agentlik yazır ki, plan hazırlandıqdan sonra ABŞ dövlət katibi Marko Rubio prosesdən xəbər tutub. Donald Trampın özü də sənəddən ən son anda məlumatlandırılıb, lakin tanış olduqdan dərhal sonra razılığını verib. Bloomberg qeyd edir ki, Tramp üçün əsas olan “razılığa nail olmaqdır”, sənədin detalları isə onun üçün ikinci dərəcəlidir.
Lakin Ukrayna üçün məhz bu “detallar” həlledicidir. Kiyev rəsmilərinin şübhələri də doğrulanıb. Rusiya sənədin əhəmiyyətli hissələrini Ukraynanın iştirakı olmadan hazırlayıb. Agentliyin yazdığına görə, sənəd hələ də rus dilindən birbaşa tərcümənin izlərini daşıyır, qeyri-adi quruluşlu cümlələr və Moskvanın terminologiyasını xatırladan ifadələrlə doludur.
Bloomberg bunun Tramp administrasiyası üçün mühüm siyasi dividendlər verə biləcəyini qeyd edir. Xüsusilə də demokratların noyabr seçkilərində əldə etdiyi qələbələr fonunda və Konqresin Trampın Epşteyn işi üzrə sənədləri açıqlamaqdan imtinası ilə bağlı gərginliklər yaşandığı bir vaxtda belə bir “sülh razılaşması” onun üçün daxili siyasətdə mövqelərini gücləndirə bilər.
Kiyev isə bildirir ki, Ukraynanın iştirakı olmadan aparılan bu danışıqlar və sənədin məzmunundakı qüsurlar ölkənin suverenlik və təhlükəsizlik maraqlarına ciddi təhlükə yaradır.
Poliqon.info
