Ses qazeti saytından verilən məlumata əsasən, ain.az məlumatı açıqlayır.
Bakıda keçirilən əzəmətli hərbi parad barədə "Kıbrıs Qəzeti" yazır: "Azərbaycan ordusunun təxminən 30 ildir Ermənistanın işğalı altında olan Qarabağı və ətraf rayonları azad etməsindən beş il ötür. İkinci Qarabağ müharibəsində Azərbaycan işğal olunmuş ərazilərini cəmi 44 günə geri aldı, nəsillərin gözləntilərinə son qoydu və tarixi bir qələbə qazandı.
Sovet İttifaqının dağılmasından sonra, təxminən 30 ildir işğal etdiyi ərazilərdən Azərbaycan mülki əhalisinə hücum edən Ermənistan, 27 sentyabr 2020-ci ildə sərhəd kəndlərini ağır silahlarla vuraraq müharibəni alovlandırdı. Prezident İlham Əliyevin əmri ilə Azərbaycan ordusu həmin gün əks-hücuma başladı. Daha sonra "Vətən döyüşü" adlandırılan əməliyyat 44 gün davam etdi. Beş şəhər, dörd qəsəbə və 286 kənd işğaldan azad edildi. Müharibə zamanı Azərbaycan ordusu 2908 şəhid verdi, erməni hücumları nəticəsində 94 mülki şəxs həyatını itirdi".
Məqalədə daha sonra yazılır: "8 noyabr 2020-ci ildə Şuşanın azad edilməsi ilə Ermənistan məğlubiyyətini etiraf etdi və 10 noyabrda Azərbaycan, Ermənistan və Rusiya arasında üçtərəfli bəyannamə imzalandı. Bəyannaməyə uyğun olaraq, Ermənistan ordusu da Ağdam, Kəlbəcər və Laçından geri çəkildi. 10 noyabr Şuşanın azad edildiyi tarixə görə "Qələbə Günü" elan edilsə də, həmin tarix Mustafa Kamal Atatürkün ölümü ilə üst-üstə düşdüyü üçün rəsmi olaraq 8 noyabr "Qələbə Günü" kimi tanındı".
Qəzet yazır ki: "İkinci Qarabağ müharibəsi zamanı Azərbaycan Ermənistan ordusuna qarşı silahlı pilotsuz uçuş aparatlarından (UCAV) effektiv şəkildə istifadə etdi. UCAV-lar tərəfindən çoxsaylı erməni silahları və sursatı məhv edildi. UCAV-lardan yayımlanan görüntülər Azərbaycanda mənəvi dəstək oldu və Ermənistan cəbhəsində ağır psixoloji çöküşə səbəb oldu. Müharibənin ilk anlarından Türkiyə rəsmiləri, xüsusən də Prezident Rəcəb Tayyib Ərdoğan, Azərbaycanı dəstəklədiklərini açıq şəkildə bəyan etdilər. Türkiyə həmçinin üçüncü tərəfləri Azərbaycanın ədalətli mübarizəsinə müdaxilə etməməyə çağırıb. Azərbaycan rəhbərliyi bu siyasi qətiyyətin müharibənin gedişatına təsir edən ən vacib amillərdən biri olduğunu vurğulayır".
"Azərbaycan 10 noyabr 2020-ci ildən bəri beş ili həm diplomatik masada qazancları möhkəmləndirməyə, həm də bölgələri bərpa etməyə sərf edib. İşğal altında viran qoyulmuş torpaqlar indi ağıllı şəhər və ağıllı kənd layihələri, yeni yollar və hava limanları ilə müasir bölgələrə çevrilir. Beş il ərzində Füzuli, Zəngilan və Laçında üç beynəlxalq hava limanı tikilib. Zəngilan, Füzuli, Cəbrayıl, Şuşa və Laçında təxminən 20.000 insan dövlət tərəfindən tikilmiş mənzillərdə məskunlaşıb. İş üçün gələnlər də daxil olmaqla, bölgədə yaşayan insanların sayı 50.000-i keçib. Azərbaycan hökuməti 2026-cı ilə qədər bölgədə 140.000 insanı məskunlaşdırmağı hədəfləyir"- qəzet yazır.
Məqalə belə yekunlaşır: "İkinci Qarabağ müharibəsindən sonra Ermənistan qoşunlarının bir hissəsini geri çəksə də, Qarabağdakı qanunsuz qondarma rejimə ağır silahlar və sursat verməyə davam etdi. Azərbaycandan dəfələrlə edilən çağırışlara baxmayaraq, bu qurum dağılmadı. Bunun ardınca 19 sentyabr 2023-cü ildə Qarabağda konstitusiya qaydasını bərpa etmək üçün antiterror əməliyyatı başladı. Təxminən 24 saat davam edən əməliyyat zamanı qanunsuz silahlı qüvvələr silahlarını yerə qoyub təslim oldular. Beləliklə, Prezident İlham Əliyevin sözləri ilə desək, "Qarabağda Azərbaycanın suverenliyi tam şəkildə bərqərar olub".
Qələbədən sonra Azərbaycan Ermənistana daimi sülh müqaviləsi təklif etdi. Xarici işlər nazirlikləri arasında danışıqlarda əhəmiyyətli irəliləyişlər əldə edildi və tərəflər sülh müqaviləsinin mətni ilə bağlı razılığa gəldilər. Mətn 8 avqustda ABŞ Prezidenti Donald Trampın ev sahibliyi etdiyi üçtərəfli sammitdə paraflanıb. Qarabağ qələbəsi təkcə hərbi qələbə deyil, həm də Cənubi Qafqazda yeni təhlükəsizlik qaydasının yaradılmasına səbəb olan tarixi bir dönüş nöqtəsi kimi qəbul edilir. Azərbaycan hökumətinin fikrincə, bu proses həmçinin regionda davamlı sülh və iqtisadi əməkdaşlığa yol açır".
Məqalənin linki:
https://kibrisgazetesi.com/azerbaycanin-karabag-zaferinin-uzerinden-5-yil-gecti/
Lalə Mehralı
Ən son xəbərləri və yenilikləri almaq üçün ain.az saytını izləyin.
