Şirvan Apellyasiya Məhkəməsində qəsdən adam öldürməyə cəhddə təqsirləndirilən Mahmud İmanovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Yaşar Həşimovun sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
İttiham aktına görə, hadisə 31 dekabr 2024-cü il tarixdə, saat 15:50 radələrində Salyan şəhəri, Ə.Hüseynov küçəsində qeydə alınıb.
Belə ki, Mahmud İmanov rəsmi qaydada boşandığı keçmiş arvadı, zərərçəkmiş Fəridə Fərəcovanın (adı, soyadı şərtidir) başqa kişi cinsli şəxslərlə münasibətdə olduğunu və əxlaqsız həyat tərzi keçirdiyini güman edərək onu qısqanıb. O, bu davranışı özünün şərəf və ləyaqətinə toxunan, cəmiyyətdə nüfuzunu zədələyən hərəkət kimi qəbul edib. Qisas almaq məqsədilə qadını öldürmək qərarına gəlib və bu məqsədlə yaşadığı evdən mətbəx bıçağı götürərək hadisə yerinə gedib.
Fəridə alış-veriş edib evə qayıdarkən aralarında yaranan mübahisə zamanı təqsirləndirilən şəxs bıçaqla onun boyun və döş qəfəsinin ön hissəsinə zərbələr endirib. Bu zaman bıçaq qırılaraq yerə düşsə də, o, cinayətkar hərəkətlərini davam etdirib, zərərçəkmişi sifət nahiyəsindən yumruqla vuraraq yerə yıxıb. Daha sonra Mahmud yerdən tapdığı beton parçası ilə qadının baş nahiyəsinə zərbə endirib və boyun fəqərələrini qırmağa cəhd edib.
Nəticədə Fəridə baş beynin əzilməsi, gicgah sümüyü və almacıq qövsünün sınıqları ilə müşayiət olunan, həyat üçün təhlükəli ağır bədən xəsarətləri alıb. Hadisə zamanı ətrafdakı şəxslərin toplaşdığını görən təqsirləndirilən şəxs hadisə yerindən qaçıb, zərərçəkmiş vaxtında Salyan Rayon Mərkəzi Xəstəxanasına çatdırılaraq ixtisaslı tibbi yardım alması nəticəsində həyatı xilas edilib.
Onun barəsində Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə ittiham irəli sürülüb.
Lənkəran Ağır Cinayətlər Məhkəməsinin hökmü ilə Mahmud İmanov 10 il müddətə azadlıqdan məhrum edilib.
Kamal Məmmədov
