Avropa Komissiyası Ukraynanın əhəmiyyətli maliyyələşdirmə çatışmazlığını birgə Avropa İttiaqı borcu və ya üzv dövlətlərdən ikitərəfli qrantlar vasitəsilə aradan qaldırmaq imkanlarını nəzərdən keçirir.
HİT.az xəbər verir ki, bu barədə "Euractiv" məsələ ilə tanış olan üç mənbəyə istinadən məlumat verib.
Bu iki variant Avropa Komissiyasının Ukraynanın maliyyələşdirilməsi ilə bağlı qeydində əks olunacaq və bu qeyd yaxın həftələrdə Aİ paytaxtlarında paylanacaq. Onlar "təzminat krediti"ni tamamlayır - Avropa Komissiyasının ən optimal hesab etdiyi, lakin Belçikanın hazırda əleyhinə olduğu bir seçim.
Eyni zamanda, Belçikanın Baş naziri Bart De Vever Kiyevə kömək etmək üçün birgə borc ideyasını dəstəkləyir.
"Borcun böyük üstünlüyü ondadır ki, siz onu başa düşürsünüz. Bunun nə olduğunu bilirsiniz. Nə vaxt geri qaytarılmalı olduğunu bilirsiniz. Bunun üçün kimin məsuliyyət daşıdığını dəqiq bilirsiniz. Rusiya aktivlərinin mənfi cəhəti odur ki, hüquqi prosesin nə qədər davam edəcəyini, nə qədər vaxt aparacağını və hansı problemlərlə qarşılaşacağınızı bilmirsiniz", deyə De Vever bildirib.
Mənbələrə görə, Avropa Komissiyasının sənədində göstərilən birgə borclanma variantı imkanların olmaması səbəbindən Aİ-nin uzunmüddətli büdcəsindən kredit üçün dəstək təmin etmir. Materialda əlavə olunur ki, maliyyələşdirmə variantları olan sənəd hələ də nəzərdən keçirilir və dəyişdirilə bilər.
Xəbər verildiyi kimi, Beynəlxalq Valyuta Fondu Ukraynanın büdcə kəsirini 2026 və 2027-ci illər üçün təxminən 65 milyard ABŞ dolları (55 milyard avro) səviyyəsində qiymətləndirir. Avropa Komissiyasının öz hesablamaları məhz BVF-nin hesablamalarına əsaslanır.
Samir
