ain.az bildirir, Xalqcebhesi portalına istinadən.
Dövlət Təhlükəsizliyi Xidmətinin (DTX) təşkilatçılığı və 90-a yaxın ölkənin xüsusi xidmət orqanlarının rəhbərlərinin və yüksək səviyyəli nümayəndələrinin iştirakı ilə “Terror aktları və silahlı münaqişələr zamanı humanitar böhranların və qlobal texnogen fəlakətlərin qarşısının alınmasında təhlükəsizlik orqanlarının birgə fəaliyyəti” mövzusunda III Bakı Təhlükəsizlik Forumu Azərbaycanda baş tutan növbəti önəmli tədbirlərdən biridir. “Xalq Cəbhəsi” sözügedən tədbirin əhəmiyyətini millət vəkilləri və politoloqlarla müzakirə edib.
Milli Məclisin deputatı Aydın Mirzəzadə vurğulayıb ki, Bakı Təhlükəsizlik Forumunun keçirilməsi Bakının təhlükəsizlik məkanına çevrildiyini, Azərbaycan və Bakı nümunəsinin dünya üçün çox əhəmiyyətli olduğunun bir daha göstəricisidir: “Hətta bizimlə diplomatik münasibətləri olmayan Ermənistanın xüsusi xidmət orqanının rəhbərinin bu tədbirdə iştirakı Bakının beynəlxalq təhlükəsizlik mühitinin formalaşmasına verdiyi qiymət hesab edilə bilər. Forumda qəbul edilmiş qərarların təhlükəsizlik mühitinin formalaşmasında böyük rol oynacayağını düşünürəm”.
Qarşılıqlı etimad və əməkdaşlıq məkanı
Milli Məclisin deputatı Azər Badamov Bakı Təhlükəsizlik Forumunun keçirilməsinin ənənəvi hal aldığını bildirərək əlavə edib ki, bu il artıq III Forumun keçilməsi yeni bir qlobal təhlükəsizlik platformasının yaranması və bu platformanın beynəlxalq ictimaiyyət tərəfindən dəstəklənməsi deməkdir: “Müxtəlif ölkələrin xüsusi xidmət orqanı rəhbərlərinin və təhlükəsizlik məsələləri üzrə ekspertlərin ümumi təhdidlərlə mübarizə məqsədilə hər il Bakıda toplaşması Forumun qarşılıqlı etimad və əməkdaşlıq məkanı olmasının bariz nümunəsidir”.
Deputat diqqətə çatdırıb ki, Prezident İlham Əliyev Forum iştirakçılarına müraciət göndərərək Azərbaycanın qlobal sülh və təhlükəsizlik arxitekturasına verdiyi töhfələr haqqında fikirləri bildirdi: “Dövlət başçımız Bakı Təhlükəsizlik Forumunun qlobal və regional təhlükəsizliyin ən aktual məsələləri barədə açıq və konstruktiv fikir mübadiləsinin aparılması üçün faydalı platformaya çevrildiyini qeyd etdi. Dövlət başçımız müraciətdə Azərbaycanın regionda sülh və sabitliyin təmin edilməsi istiqamətində atdığı konstruktiv addımlarını forum iştirakçılarının diqqətinə çatdırır. Belə ki, qarşıya qoyduğumuz əsas hədəflərdən biri regionda qarşılıqlı inama, təhlükəsizliyə və praqmatizmə əsaslanan yeni əməkdaşlıq formatının qurulması olduğunu bildirir”.
“Bakının təşəbbüslərinin dəstəklənməsi...”
A.Badamovun sözlərinə görə, dövlət başçısı 8 avqust 2025-ci ildə Vaşinqtonda imzalanmış sazişləri çox yüksək dəyərləndirərək bunun ancaq Azərbaycan və Ermənistan arasında sülhün yaranmasına yox, həm də Cənubi Qafqazda əmin-amanlığın tam təmin olunmasına eləcə də Mərkəzi Asiya, Yaxın Şərq və Avropa üçün yeni əməkdaşlıq imkanları yaradacağını qeyd etdi: “Təbii ki, Azərbaycanın sülh gündəliyi heç bir ölkənin maraqlarına qarşı deyil. Bu ancaq böyük bir coğrafiya arasında yeni əməkdaşlıq imkanları yaradır. Azərbaycan Bakı Təhlükəsizlik Forumunun təsisatlanması və daha da genişlənməsinə təşəbbüslə çıxış edir. Forum iştirakçılarının Bakının təşəbbüslərini dəstəkləməsi verdiyimiz töhfələrin müsbət qarşılanması deməkdir. Biz qlobal sülhün və təhlükəsizliyin möhkəmlənməsi üçün təşəbbüslərlə çıxış edən çox az ölkələrdənik. Bu, bizim uzun illər formalaşdırdığımız sülh arxitekturasının düzgün olduğunu bir daha təsdiq edir”.
Konseptual baxış
Siyasi elmlər üzrə fəlsəfə doktoru, politoloq Şəbnəm Həsənova qeyd edib ki, istənilən sahənin öyrənilməsinin səbəb-məqsədi olduğu qədər, başlanğıc nöqtəsi də var: “Təhlükəsizlik sahəsinin öyrənilməsi silahlı münaqişələrin nəticələrini aradan qaldırmaq və ya minimallaşdırmaq üçün bir yol kimi başlanıb”.
Ş.Həsənova qeyd edib ki, daha sülhsevər bir dünya vəd edə bilmək niyyətinin özü belə tarixi aspektləri nəzərə alaraq empirik addımlar atmaqdan keçir: “Bu məsələyə dar çərçivədən baxmaq olmaz, ona nəzəri və konseptual baxış ortaya qoyulmalıdır. Azərbaycan Liderinin və dövlətinin atdığı addımlarda koordinasiyalı və sistemli iş aparıldığının şahidiyik. Effektiv təhlükəsizlik kəşfiyyatı aparmaq, eyni zamanda insan hüquq və əsas azadlıqlarının qorunmasını təmin etmək müharibədən sonra daha zəruri hal alıb”.
“Forum artıq institutlaşdırılır”
O, bildirib ki, dünyada yaşanan son fəlakətlər və bu istiqamətdə daha çox potensialın artacağına dair proqnozlar təhdidlərə qarşı ən yaxşı siyasi cavablar haqqında düşünməyə də təkan verir: “Texnolji yeniliklərin gətirmiş olduğu çağırışlar da fərqlidir, müasirdir, bir o qədər də mürəkkəbdir. Bu baxımdan dövlətlər son trendlər daxil olmaqla, ən son siyasi dəyişiklikləri, ssenariləri də nəzərə alaraq təhlükəsizlik və kəşfiyyat baxımından birgə iş ortaya qoymalıdırlar. Azərbaycan nüfuzlu tədbirlərə evsahibliyi etməkdə dünyaya ün salıb. Bakı Təhlükəsizlik Forumu onlardan sadəcə biri olsa da, olduqca önəmlisidir. Üstəlik, ötən il Bakı Təhlükəsizlik Forumunun ənənəvi qaydada və illik əsasda təşkil edilməsi, habelə davamlı fəaliyyət göstərməsi ilə bağlı Azərbaycan tərəfindən irəli sürülmüş təklifin iştirakçı ölkələr tərəfindən fəal şəkildə dəstəklənməsi bizə olan inam və etimadın bariz nümunəsidir. Forum artıq institutlaşdırılır. Deməli, fəaliyyət sistemli və gələcəyə, uzunmüddətli hədəflərə yönəlmiş qaydadadır”.
Röya İsrafilova
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
