Saçların ağarması əsasən genetik və yaşlanma ilə bağlı olsa da, bəzi hallarda həyat tərzi və qidalanma da bu prosesi sürətləndirə bilir.
Far.Az xəbər verir ki, mütəxəssislər saçların ağarmasını tamamilə dayandırmağın mümkün olmadığını, lakin müəyyən tədbirlərlə bu prosesi yavaşlatmağın mümkün olduğunu bildirirlər.
Vitamin və mineral çatışmazlığının qarşısını alın
B12, D vitamini, fol turşusu, dəmir və sinkin çatışmazlığı saçların tez ağarmasına səbəb ola bilər. Balıq, yumurta, süd məhsulları, göyərti və paxlalılar rasionda mütləq yer almalıdır.
Stressi azaldın
Daimi stress saç follikullarına mənfi təsir edir və melaninin - saç rəngini verən piqmentin azalmasına gətirib çıxarır. Yoga, meditasiya və açıq havada gəzinti faydalıdır.
Zərərli vərdişlərdən uzaq durun
Siqaret və alkoqol istifadəsi saçların vaxtından əvvəl ağarmasını sürətləndirir.
Sağlam saç baxımı
Kimyəvi boyalar, tez-tez fen və ütü istifadəsi saç köklərini zəiflədir. Təbii yağlarla (zeytun, kokos, badam yağı) müntəzəm masaj tövsiyə olunur.
Antioksidantlarla zəngin qidalar yeyin
Meyvə-tərəvəz, yaşıl çay və qoz-fındıq kimi qidalar saç hüceyrələrini sərbəst radikallardan qoruyur.
Qan dövranını yaxşılaşdırın
Müntəzəm idman və baş dərisinə masaj saç köklərinin qidalanmasını gücləndirir, melaninin azalmasını ləngidir.
Qeyd edək ki, saçların ağarması tam qarşısı alına bilməz, amma sağlam qidalanma, stressdən uzaq həyat və düzgün saç baxımı bu prosesi yavaşlada bilər.
