FTB direktoru Keş Patel mühafizəkar fəal Çarli Kirkin qətli ilə bağlı aparılan istintaq zamanı bir sıra ciddi səhvlərə yol verib.
Musavat.com CNN-ə istinadən xəbər verir ki, bu, ABŞ prezidenti Donald Trampın ətrafındakıların onun səlahiyyətlərini şübhə altına almasına səbəb olub.
Qeyd olunur ki, FTB rəhbərinin Kirkin qətlindən sonra baş verən sürətli hadisələr zəncirinə reaksiyası Trampın bəzi müttəfiqlərinin Patelin böyük agentliyə uğurla rəhbərlik etmək qabiliyyətinə şübhə etməsinə səbəb olub. Bəzi ABŞ rəsmiləri FTB-nin qətldən sonra şübhəlinin fotoşəkillərini dərhal dərc etmədiyinə və beləliklə, ilk gündə vaxt itirdiyinə görə Pateli tənqid etdi.
CNN mənbələrinin məlumatına görə, Patelin FTB-nin qətllərin araşdırılması və cinayətkarların tapılması üsullarını dərindən bilən təcrübəli yüksək rütbəli əməkdaşlarını işdən çıxarması da qurumun Kirkin qatilini ən qısa müddətdə tutmasına mane olub.
İstintaqla tanış olan insanların fikrincə, başqa bir səhv FTB-nin Kirki öldürmək üçün istifadə edilən tüfəngi uzun müddət özündə saxlaması olub. Yalnız ABŞ-ın baş prokuroru Pem Bondi və onun müavini Todd Blanşın müdaxiləsindən sonra silahlar ekspertiza üçün Alkoqol, Tütün, Odlu Silahlar və Partlayıcılar Bürosuna təhvil verilib.
Televiziya şirkəti qeyd edir ki, həm FTB daxilində, həm də ondan kənarda narazılığın səbəbi Patelin şübhəli şəxs saxlanıldıqdan sonra Yuta ştatında keçirdiyi mətbuat konfransında verdiyi açıqlama olub. Büronun bəzi agentləri Patelin istintaqın ən uğurlu mərhələlərini öz adına çıxmağa çalışmasından qıcıqlanıb. Eyni zamanda sentyabrın 10-da səhvən X-də qatilin həbs olunduğuna dair məlumat yerləşdirib, bir neçə saat sonra onu silən də Patel olub. Nəticədə həm FTB agentləri, həm də Ədliyyə Nazirliyinin rəhbərliyi Patelin sosial şəbəkələrdəki paylaşımlarından narazı qalıb.
Musavat.com
