İsrailin baş naziri Benyamin Netanyahu ilk dəfə olaraq Osmanlı imperiyası tərəfindən XX əsrin əvvəllərində törədildiyi iddia olunan qondarma “erməni soyqırımı”nı tanıdığını bəyan edib.
Redaktor.az-a açıqlama verən politoloq Natiq Miri bildirdi ki, bir siyasətçiyə, xüsusən də dövlət başçısına belə davranış yaraşmaz.
"Çünki bu açıqlama nifrət və qəzəbdən qaynaqlanır. Halbuki siyasətçilər hisslərini idarə etməyi bacarmalıdır.vKnesset qondarma “erməni soyqırımı” məsələsini müzakirə predmetinə çevirsə də, bu istiqamətdə heç bir konkret qətnamə qəbul etməyib, soyqırımı təsdiq edən siyasi qərar verməyib. Təbii ki, bu kontekstdə indiyədək heç bir İsrail baş naziri də rəsmi olaraq qondarma soyqırımı tanıdığını bəyan etməyib. Bu faktın özü göstərir ki, Netanyahunun açıqlaması öfkə və nifrətdən doğan, hüquqi, legitim əsası olmayan bir fikirdir. Bu, nə İsrail xalqının, nə də yəhudilərin mövqeyini əks etdirir".
Onun fikrincə, Netanyahuya ən düzgün cavabı Ermənistanın Baş naziri Nikol Paşinyan verib:
"O açıq şəkildə bildirib ki, bu cür qərarlar Ermənistana bəladan başqa heç nə gətirməyib. İndiyədək onlarla dövlət qondarma soyqırımı siyasi qərar kimi tanıyıb, amma bunun Ermənistana hansı faydası olub? Bu sualın cavabını ermənilər özləri düşünməlidir. Əslində bu məsələni geosiyasi alətə çevirən qlobal və regional güc mərkəzləri, həmçinin maliyyə, siyasi dairələrdir. Onlar bundan qardaş Türkiyəyə təzyiq vasitəsi kimi istifadə ediblər. Bundan əlavə, xüsusilə erməni kilsəsi, xaricdəki erməni lobbisi və Daşnaksütun bu mövzunu ideologiyaya və mübarizə predmetinə çevirərək milyardlarla vəsait qazanıblar. Yəni erməni xalqının hissləri üzərindən “kapital sənayesi” yaradılıb.
Paşinyanın özü də bu gün bunu etiraf edir. Deməli, əgər Ermənistanın dövlət başçısı belə bir açıqlamanın ölkəsinə fayda yox, zərər gətirdiyini bildirirsə, Netanyahunun bəyanatı da “katolik papasından daha çox katolik olma” iddiasından başqa bir şey deyil".
Aytəkin TOFİQQIZI
