ABŞ Prezidenti Donald Tramp Rusiyanın Kiyevə son hücumlarından narazıdır. Bunu Ağ Evin mətbuat katibi Karolin Levitt brifinqdə deyib.
Levitt qeyd edib ki, prezident Ukraynadakı prosesləri diqqətlə izləyir: “Prezident bu müharibənin bitməsini istəyir, lakin ola bilsin ki, hər iki tərəf hələ onun bitməsinə hazır deyil”.
Onun sözlərinə görə, ABŞ prezidenti Kiyevə hücumla bağlı xəbəri eşidəndə məyus olsa da, təəccüblənməyib. “Bu iki ölkə uzun müddətdir ki, müharibə aparır”, - Levitt qeyd edib.
Mətbuat katibi xatırladıb ki, Kiyevə edilən son zərbələrdən əvvəl Ukrayna da Rusiyanın neft emalı zavodlarına zərbələr endirib və onların gücünün təxminən 20 faizini sıradan çıxarıb.
Levitt vurğulayıb ki, münaqişənin sona çatması Rusiya və Ukraynanın danışıqlar masasına əyləşməsini tələb edir: “Prezident müharibənin bitməsini istəyir, lakin bunun baş verməsi üçün hər iki ölkənin lideri də onun bitməsini istəməlidir”.
Ukrayna Prezidenti Vladimir Zelenski bildirib ki, Rusiyanın Kiyevə endirdiyi son aviazərbələr nəticəsində dördü uşaq olmaqla 17 nəfər ölüb, onlarla insan yaralanıb.
Genişlənmə üzrə Avropa komissarı Marta Kos hücumun Kiyevdəki Aİ nümayəndəliyinin binasına ziyan vurduğunu deyib.
Britaniyanın Baş naziri Kir Starmer də narahatlığını ifadə edərək, xaricdə təhsil və mədəniyyət fəaliyyətləri ilə məşğul olan “British Council” binasının zədələndiyini bildirib.
Rizvan CƏFƏROV,
“Azərbaycan”
