Ermənistan Baş nazirinin mətbuat xidməti Vaşinqtonda imzalanmış “Ermənistan Respublikası ilə Amerika Birləşmiş Ştatları arasında Anlaşma Memorandumu”nun mətnini dərc edib.
APA xəbər verir ki, bu haqda Ermənistan mətbuatı xəbər yayıb.
Memorandumda Ermənistanın suverenliyinə, ərazi bütövlüyünə və onun beynəlxalq səviyyədə tanınmış sərhədlərinin toxunulmazlığına qeyd-şərtsiz dəstək, Ermənistanın “Sülhün Qovşağı” layihəsinə investisiya qoyuluşu və ölkənin infrastrukturunun, sərhəd təhlükəsizliyinin, gömrük xidmətini işin yaxşılaşdırılması, eləcə də regional və qlobal ticarət üçün səmərəli tranzit mərkəzi kimi fəaliyyət göstərmə qabiliyyətinin gücləndirilməsi ilə bağlı bəndlər öz əksini tapıb.
Diqqəti çəkən məqam Memorandumda Ermənistanda mövcud olan yarımkeçiricilərin ekosistemi və onların ixracı üzərində etibarlı nəzarət tədbirlərinin gücləndirilməsinə dair maddələrdir. Belə ki, hazırda silah istehsalında geniş istifadə olunan yarımkeçirilərin Rusiyaya ixracı həm də Ermənistan üzərindən həyata keçirilir.
Qeyd edək ki, Memorandum imzalandığı tarixdən etibarən qüvvəyə minir və bir il müddətində qüvvədə qalır. Tərəflərin etirazı olmasa bu Anlaşma Memorandumları çərçivəsində əməkdaşlığın daha 3 müddət ərzində davam etdirilməsi nəzərdə tutulur.
