"Hələ ilin əvvəlində mətbuat yazırdı ki, general Manvelin qudası olan və əvvəllər Ermənistan Respublika Partiyasının üzvü olan Artik icmasının rəhbəri Ananik Voskanyan 1965-ci ildə icmada tikilmiş Böyük Vətən Müharibəsində həlak olanların xatirəsinə həsr olunmuş abidəni sökmək qərarına gəlib. Xəbər ajiotaj yaradıb və hətta Rusiya mətbuatında da yayılıb, Ermənistan-Rusiya münasibətlərinin gərginləşməsi kontekstində nəzərdən keçirilib".
Moderator.az xəbər verir ki, bunu "Hraparak" yazır.
Ardınca erməni nəşri bildirir ki, daha sonra sözügedən abidənin şəhərin mərkəzindəki Azadlıq meydanından sökülməsi, köçürülməsi və şəhərin başqa bir yerində, Dostluq parkında bərpasının nəzərdə tutulduğuna dair dəqiqləşdirmələr aparılıb. Lakin məlum olub ki, bu izahatlar rusları qane etməyib və aylar sonra onlar Artik merini cəzalandırmaq qərarına gəliblər.
Erməni nəşrinin məlumatına görə, bu yaxınlarda qohumunun tədbirində iştirak etmək üçün Rusiyaya gedən mer iki gün hava limanında saxlanılıb. Bir az sonra isə ona 50 il müddətinə Rusiya Federasiyasına girişinə qadağa qoyulduğu bildirilib.
Xatırladaq ki, xüsusən Ukraynaya təcavüzə başlayandan bəri işğalçı Rusiya hakimiyyəti bir sıra xarici ölkə vətəndaşlarına həmin ölkəyə girişə 50 illik qadağa qoyub.
2022-ci ilin aprelində Kreml 50 il ərzində, 2072-ci ilə qədər bir sıra ukraynalı məşhurların ölkəyə girişini qadağan edib. Siyahıya məşhur bloger Anton Ptuşkin, Andrey Danilko (Verka Serduçka), Svetlana Loboda və başqaları daxildir. Bu, onların sərt anti-müharibə mövqeyi və Rusiyanın Ukraynadakı müharibəsi ilə bağlı tənqidi bəyanatları ilə bağlıdır.
O cümlədən məşhur özbəkistan müğənnisi Nərgizə də eyni səbəbdən belə bir qadağa qoyulub.
Azərbaycandan da bu siyahıda olan var. Hələ 2021-ci ilin avqustunda Rusiya Liberal Demokrat Partiyasının o vaxtkı rəhbəri Vladimir Jirinovskini "eşşək" adlandıran və rusları "donuz"la müqayisə edən keçmiş azərbaycanlı diplomat İsfəndiyar Vahabzadəyə də 50 il ərzində Rusiyaya səfərə qadağa qoyulub.
S.Laçın
