Ajans.az Reuters-ə istinadən xəbər verir ki, bu qərar regionla bağlı əlaqələrin hələ tam nəzərdən keçirilməməsi səbəbindən verilib. Solomon Adaları Çinin Sakit okeanda əsas müttəfiqlərindən biri hesab olunur və 2019-cu ildə Tayvanla diplomatik əlaqələri kəsərək Pekinlə əməkdaşlığa başlayıb. Aprel ayında isə Tayvanı güzəştli giriş hüququ olan ölkələr siyahısından çıxarıb. Bu qərar Çinlə deyil, Tayvanla diplomatik əlaqələri olan üç ada dövlətində narahatlıq yaradıb. Baş nazir qeyd edib ki, builki toplantıya yalnız Dünya Bankı, Asiya İnkişaf Bankı və bəzi vətəndaş cəmiyyəti təşkilatları qatılacaq. Müxalifət siyasətçisi Peter Kenilorea Jr bu addımı region ölkələri üçün qlobal donorlarla təmas imkanının itirilməsi kimi qiymətləndirib və bu qərarın arxasında Çin və Tayvanla bağlı siyasi təsirlərin dayandığını bildirib. Marşal Adalarının prezidenti Hilda Heine isə Pekinin keçmiş forumlarda Tayvana istinadların sənədlərdən çıxarılmasına təsir etdiyini xatırladaraq, bu cür müdaxilələri tənqid edib. Region ABŞ və Çin arasında artan rəqabətin mərkəzindədir. Forumun böyük üzvlərindən olan Avstraliya və Yeni Zelandiya ABŞ-ın tərəfdaşları olsa da, nə Vaşinqton, nə də Pekin foruma üzv deyil. Kenilorea Jr xəbərdarlıq edib ki, Çinin forumun kənarında liderlərlə ikitərəfli görüşlər keçirmək istəyi kollektiv birliyə təhlükə yarada bilər. Forumun xarici işlər nazirləri gələn həftə Ficidə toplaşacaqlar.
