"Bu gün Türkiyənin Kilis şəhərində tarixi bir ana şahidlik edirik".
Moderator.az "Report"a istinadən xəbər verir ki, bunu Türkiyənin enerji və təbii sərvətlər naziri Alparslan Bayraktar avqustun 2-də Kilis şəhərində Azərbaycan qazının Türkiyə ərazisindən Suriyaya nəqlinə başlanılması ilə bağlı tədbirdə deyib.
Onun sözlərinə görə, Türkiyə-Suriya təbii qaz boru kəməri xəttinin açılışı Türkiyə-Suriya dostluğunun enerji sahəsində ən önəmli nişanıdır.
"Bu beynəlxalq layihədə birlikdə çalışdığımız Suriya, Azərbaycan və Qətərə təşəkkür edirəm. Bu təbii qaz boru xəttinin ölkələrimiz və xalqlarımıza bərəkət və rifah, bölgəmizdə isə sülh gətirməsini diləyirəm", - nazir bildirir.
SOCAR ilə birlikdə Azərbaycan qazının Türkiyə-Suriya sərhədində təhvil verilməsini nəzərdə tutan "swap" (mübadilə) razılaşmasının imzalandığını bildirən Türkiyə Respublikasının energetika və təbii sərvətlər naziri Alparslan Bayraktar kədərli və sevincli günlərdə daim Türkiyənin yanında olan Azərbaycanın bu layihədə də dəstəyini əsirgəmədiyini qeyd edib. Azərbaycanın təbii qazının Kilis vasitəsilə Suriyaya ixrac olunacağını söyləyən nazir "Yavuzlu Ölçmə" Stansiyasından gündəlik altı milyon kubmetr təbii qazın nəql olunacağını bildirib.
A.Bayraktar Suriyaya qaz ixracı nəticəsində oradakı elektrik stansiyalarının da yaxın zamanda fəaliyyətə başlayacağını deyib. İlkin mərhələdə Suriyaya ildə iki milyard kubmetrə qədər təbii qaz ixracı mümkün olacaq. Bu təbii qaz vasitəsilə təqribən 1200 meqavatlıq quraşdırılmış güc aktivləşəcək. Bu layihə Suriyada həyatın normallaşmasına çox ciddi töhfə verəcək, insanların həyat səviyyəsini yüksəldəcək və ölkəyə geri qayıdış prosesini sürətləndirəcək.
