BAKI, 28 iyul. TELEQRAF
Fransa parlamentindəki "Milli cəbhə" fraksiyasının lideri Marin Le Pen Aİ və ABŞ arasında ticarət sazişinin uğursuz olduğunu bəyan edib.
Teleqraf xəbər verir ki, bu barədə o, X sosial şəbəkəsindəki hesabında paylaşım edib.
“Avropa Komissiyasının sədri Ursula fon der Leyenin ABŞ prezidenti Donald Trampla bağladığı razılaşma siyasi, iqtisadi və mənəvi fiaskodur”, - Le Pen yazıb.
Onun sözlərinə görə, Aİ ölkələri Böyük Britaniyadan daha pis şərtlərlə üzləşib.
Siyasətçi vurğulayıb ki, sazişdə asimmetrik müddəalar var.
"Fransa hər il ABŞ-dan yüz milyardlarla avro dəyərində qaz və silah idxal etməli olacaq. Bu, sənayemizin təslim olması və enerji suverenliyinin itirilməsidir", - o izah edib.
İyulun 27-də ABŞ prezidenti Donald Tramp Avropa Komissiyasının sədri Ursula fon der Leyen ilə Şotlandiyada keçirdiyi görüşdə ABŞ və Avropa İttifaqının ticarət sazişi üzrə razılığa gəldiyini açıqlayıb . O qeyd edib ki, bu, “bir çox ölkələrlə böyük bir müqavilədir”. Amerika liderinin sözlərinə görə, onlar ABŞ ilə sıfır tariflərlə ticarət etmək üçün bazarlarını açacaqlar.
