Bu günlərdə Çinin Sincan-Uyğur Muxtar Rayonunun Qızılsu Qırğız Muxtar prefekturasının Atuşi şəhərində Manas dastanı mədəniyyətinin irsi üçün multimodal rəqəmsal laboratoriyanın yaradılması mərasimi keçirilib.
Hafta.az-ın yazdığına görə, laboratoriya prefektura xalq hökuməti və Sincan Normal Universiteti tərəfindən iyulun 13-də başlayıb 20-dək davam edəcək “Manas Epic” Beynəlxalq Mədəniyyət və Turizm Festivalı çərçivəsində birgə yaradılıb.
Məlumatda deyilir ki, yeni laboratoriya bu bədii şah əsərinə yeni təkan vermək üçün eposla bağlı materialların və resursların rəqəmsal saxlanmasına, eləcə də rəqəmsal texnologiyalar vasitəsilə fəal şəkildə yayılmasına şərait yaradacaq.
Sincan Normal Universitetinin vitse-prezidenti Liu Çenjianq qeyd edib ki, Manas hazırda varislərin qocalması və məhdud paylanma kimi problemlərlə üzləşir. Rəqəmsal texnologiya təkcə tamaşaların qiymətli video kadrlarını uzun müddət saxlamağa kömək etmir, həm də gənc nəslə interaktiv sərgilər, VR tamaşaları və digər formalar vasitəsilə eposun cazibəsinə qərq olmağa imkan yaradır.
“Manas” qəhrəmanlıq eposu baş qəhrəmanın – qırğız tayfalarını birləşdirən əfsanəvi qəhrəman Manasın həyatı və şücaətləri ilə bağlı nağıllar silsiləsidir. Qırğız xalqının şifahi folklorunda mühüm yer tutur. Bu dastan tibet etnik qrupunun “Kral Qesar” və monqol etnik qrupunun “Canqar” qəhrəmanlıq dastanları ilə yanaşı, Çinin etnik azlıqlarının üç qəhrəmanlıq dastanından biri kimi tanınır. “Manas” 2009-cu ildə UNESCO-nun “Bəşəriyyətin Qeyri-Maddi Mədəni İrs üzrə Reprezentativ Siyahısı”na daxil edilib. Tarixçilərin bildiyi kimi, onu yazılı şəkildə qeydə almağa cəhd edilməmişdən əvvəl onu özünəməxsus tərənnüm ritmi ilə ifa edən xalq artistləri tərəfindən şifahi şəkildə ötürülüb. Bu laboratoriyanın yaradılması və tematik mədəniyyət festivalının keçirilməsi ilə yanaşı, SUMR rəhbərliyi tərəfindən “Manas” eposunun yaradıcı transformasiyası və innovativ inkişafının təşviqi istiqamətində müxtəlif tədbirlər həyata keçirilib, o cümlədən dastançılar üçün kurslar və müsabiqələr təşkil olunub, cari ilin may ayında “Manas” dastanının qorunub saxlanılması ilə bağlı qanunvericilik aktı qəbul edilib.
