Almaniyanın 20-yə yaxın siyasətçisi və mədəniyyət xadimi Almaniya kansleri Fridrix Merzin İsrailin İrana qarşı hərəkətləri ilə bağlı bəyanatlarına görə ona qarşı şikayət ərizəsi imzalayaraq prokurorluğa göndərib.
AFN.az xəbər verir ki, bu barədə "Berliner Zeitung" qəzeti müvafiq müraciətə istinadən məlumat yayıb.
Şikayət Almaniya Baş Prokurorluğuna və Berlin Prokurorluğuna təqdim olunub. Sənədi imzalayanlar arasında rəssamlar, musiqiçilər, komiklər, publisist Patrik Baab – “Sahibkarlıq və Ədalət Uğrunda Sara Vaqenknext İttifaqı” (BSW) partiyasının siyasətçisi, eləcə də BSW-ni Avropa Parlamentində təmsil edən Mihael fon der Şulenburq yer alır.
Onlar kanslerin bəyanatlarına görə barəsində hüquqi tədbirlərin görülməsini tələb edirlər.
Müəlliflər vurğulayırlar ki, Merz Almaniya Konstitusiyasında təsbit olunmuş “beynəlxalq qarşılıqlı anlaşma ideyasını” və “sülh əmrini” pozub. Bəyanatda qeyd olunur ki, Merz İsrail Baş naziri Benyamin Netanyahunun “İranın nüvə bombası hazırlamasının qarşısını almışam” sitatını əsas götürür. Lakin ABŞ xüsusi xidmət orqanları bu iddianı təsdiqləmir.
Qeyd olunub ki, Netanyahu artıq 2002-ci ildən bu yana, 23 ildir, İranın nüvə silahını tamamlamağa yaxın olduğunu iddia edir.
“Berliner Zeitung” qeyd edir ki, bəyanatda Fridrix Merz nasist terminologiyasından istifadə etməkdə də ittiham olunur. İctimaiyyət nümayəndələri onun bəyanatları ilə SS oberşturmfüreri Avqust Hefnerin Babi Yar qətliamlarına dair dedikləri arasında paralel qururlar. Hefner bu qırğınları “çirkli iş” adlandırırdı.
