İranın hava hücumundan müdafiə bazasının komandiri Xatəm əl-Ənbiya bildirib ki, Moskva vaxtı ilə saat 20:30-da bir saat ərzində ölkənin müxtəlif bölgələrində 10 İsrail hərbi təyyarəsi vurulub. Bu barədə daha ətraflı məlumat verilməyib. Verilən məlumata görə, İran Hərbi Dəniz Qüvvələri Oman dənizində Britaniyaya məxsus kəşfiyyat esminesinin qarşısını alıb. İran mətbuatı yazır ki, o, iyunun 13-də axşam saatlarında “İsrail raketlərini İran ərazisinə yönəltmək məqsədi ilə” Hind okeanının şimal hissəsinə daxil olub. Hərbi Dəniz Qüvvələrinin pilotsuz döyüştəyyarələri xəbərdarlıqlar edərək, esminesin Fars körfəzinə doğru irəliləməsinə mane olub. Esmines məcbur olub kursunu dəyişib. İyunun 14-də İsrailin təcavüzü fonunda ölkə boyu ümummilli mitinqlər keçirilib. Şüarlar səsləndirən və öldürülən komandirlərin şəkillərini tutan iranlı nümayişçilər İsrailə qarşı cavab əməliyyatını dəstəklədiklərini bildiriblər.
Məlum olduğu kimi, İyunun 13-nə keçən gecə İsrail İrana qarşı “Yüksələn Aslan” adlanan əməliyyata başlayıb. Zərbələr nüvə və hərbi obyektlərə, eləcə də yüksək rütbəli hərbçilərin yerləşdiyi məkanlara endirilib. İrana hücum nəticəsində azı 78 nəfər həlak olub, 320-dən çox insan isə yaralanıb. İyunun 14-nə keçən gecə İran raket və pilotsuz təyyarələrdən istifadə edərək İsrail ərazisinə kütləvi hücuma keçib. Qarşılıqlı hücumlar iyunun 14-də davam edir. MAQATE-nin məlumatına görə, İranın İsfahan şəhərində dörd nüvə infrastrukturuzədələnib.
Surxay Əliyev
