ain.az xəbər verir, Redaktor.az saytına əsaslanaraq.
Mütəxəssislər ürək-damar xəstəlikləri riskini artıran və "pis" xolesterinin səviyyəsinin yüksəlməsinə səbəb olan beş zərərli axşam vərdişini açıqlayıblar.
Redaktor.az bu barədə xarici mediaya istinadla xəbər verir.
Məlumata görə, axşam yeməyindən sonra hərəkətsiz qalmaq ən təhlükəli vərdişlərdən biridir. Kardioloq Serciu Darabant bildirib ki, yeməkdən dərhal sonra uzun müddət oturmaq və ya uzanmaq visseral piylərin yığılmasına, insulinə qarşı həssaslığın azalmasına və qanda triqliseridlərin artmasına səbəb ola bilər. Həkimin sözlərinə görə, yeməkdən sonra qısa gəzinti belə orqanizmin yağları daha səmərəli emal etməsinə kömək edir.
Dietoloq Mişel Rutenşteyn isə axşam saatlarında alkoqol qəbulunun da ürək sağlamlığı üçün risk yaratdığını vurğulayıb. Onun sözlərinə görə, spirtli içkilər triqliseridlərin səviyyəsini artırır, qaraciyərə əlavə yük yaradır və piylənmiş qaraciyər xəstəliyinin yaranma riskini yüksəldir.
Mütəxəssislər gec saatlarda yemək yeməyin də sağlamlığa mənfi təsir göstərdiyini qeyd ediblər. Bildirilib ki, yatmazdan qısa müddət əvvəl qəbul olunan qidalar yağların normal parçalanmasını çətinləşdirir və "pis" xolesterinin artmasına şərait yaradır. Həkimlər axşam yeməyini yuxudan ən azı 2-3 saat əvvəl bitirməyi tövsiyə edirlər.
Siyahıda yer alan digər amillərdən biri də axşam saatlarında davamlı stress yaşamaqdır. Araşdırmalara görə, stress hormonu olan kortizolun yüksəlməsi həm yuxu keyfiyyətini pisləşdirir, həm də damar divarlarında aterosklerotik lövhələrin yaranmasına səbəb olan aşağı sıxlıqlı lipoproteinlərin (LDL) səviyyəsini artırır.
Bundan əlavə, gecə saatlarında yağlı qəlyanaltılardan istifadə etmək də ürək sağlamlığı üçün təhlükəli hesab olunur. Dondurma, yağlı pendirlər və doymuş yağlarla zəngin digər məhsullar LDL xolesterinin yüksəlməsinə səbəb ola bilər. Mütəxəssislər daha sağlam alternativ kimi meyvə və qoz-fındıq məhsullarını tövsiyə edirlər.
NURİYYƏ
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
