Bizi Telegram-da da izləyə bilərsiniz:@xqazeti
Antarktidadakı rəsmi olaraq "Qiyamət günü buzlağı" kimi tanınan nəhəng Tueyts buzlağının əriməsi bir sıra dövlətlər üçün fəlakətli nəticələrə yol aça bilər. Böyük Britaniyanın nüfuzlu "Daily Express" nəşrinin yaydığı elmi xəbərdarlığa istinadən bildirilir ki, beynəlxalq ekspertlər hazırda sahəsi təxminən Böyük Britaniya ərazisinə bərabər olan bu nəhəng buz kütləsinin vəziyyətini ciddi nəzarətdə saxlayırlar. Alimlərin hesablamalarına görə, bu buzlağın tamamilə parçalanması dünya okeanında suyun səviyyəsinin 60 santimetrdən çox yüksəlməsinə səbəb ola bilər.
Sözügedən qlobal dəyişikliklərdən ən ciddi zərər çəkəcək ölkələr arasında elə Böyük Britaniyanın özü də var. Ekspertlərin proqnozlarına görə, artıq yaxın onilliklərdə krallığın irihəcmli sahilyanı əraziləri su altında qalmaq riski ilə üz-üzədir.
Təbii fəlakət qarşısında ən müdafiəsiz qalan dövlətlərin siyahısına, həmçinin aşağıdakı ölkələr daxildir:
· Niderland: Ölkənin Amsterdam, Rotterdam və Haaqa kimi bir çox böyük şəhərləri dəniz səviyyəsindən aşağı və ya çox alçaq düzənliklərdə yerləşdiyindən, okeanın hər bir santimetr yüksəlməsi bütöv şəhərlərin mövcudluğunu təhlükəyə atır.
· ABŞ: Ştatların bəzi sahilyanı regionları və böyük meqapolisləri eyni təhdid altındadır.
· Bəhreyn və Banqladeş: Xüsusilə Banqladeş ərazisinin təxminən 70%-i dəniz səviyyəsindən cəmi bir metrdən də az hündürlükdə yerləşir.
· Maldiv Adaları: Ən optimist ssenaridə belə, XXI əsrin sonuna qədər bu ada-dövlətinin ərazisinin 90%-dən çoxunun tamamilə okean sularına qərq olacağı proqnozlaşdırılır.
Mütəxəssislər xəbərdarlıq edirlər ki, "Qiyamət günü buzlağı"nın tam çöküşü təkcə lokallaşdırılmış daşqınlara deyil, qlobal iqtisadiyyatın və miqrasiya xəritəsinin kökündən dəyişməsinə səbəb olacaq qlobal humanitar böhrana gətirib çıxaracaq.
Hazırladı:
Arzu ƏLİYEVA
XQ
