Rumıniyada Bayya-Sprie (Baia Sprie) adlı şəhər var ki, o, qədim vulkanik kraterin daxilində yerləşməsi ilə seçilir.
Azreform.info xəbər verir ki, bu barədə Gandul.ro yazır.
Şəhərin yerləşdiyi ərazi milyonlarla il əvvəl baş vermiş vulkanik fəaliyyət nəticəsində formalaşmış dağlıq çökəklikdədir və ətrafı vulkan mənşəli dağlarla əhatə olunub. Bu geoloji xüsusiyyət regionda zəngin metal yataqlarının — qızıl, gümüş, mis, qurğuşun və sink — yaranmasına səbəb olub.
Vulkan mənşəli landşaft və mədənçilik tarixi
Məlumata görə, Bayya-Sprie Gutay dağ massivinin ətəyində yerləşir və bölgədə neogen dövrünə aid qədim vulkanik strukturlar qorunub saxlanılıb.
Şəhərin üzərində yerləşən Xaç təpəsi keçmiş vulkanik mərkəzin qalıqları hesab olunur. Burada əsrlər boyu aparılan mədənçilik fəaliyyəti nəticəsində yeraltı tunellər və şaxtalar əmələ gəlib və onlar vulkanik süxurların damarlarını izləyərək qazılıb.
Mədənçilik Bayya-Sprie bölgəsində Transilvaniyanın ən mühüm sənaye sahələrindən biri olub.
Mavi göl – unikal təbiət hadisəsi
Şəhərin ən məşhur turistik məkanlarından biri Mavi göldür. Bu göl Xaç təpəsinin cənub yamacında yerləşir və əslində təbii göl deyil.
Tədqiqatlara görə, bu su hövzəsi təxminən 1919–1920-ci illərdə köhnə Domnişoara mədən qalereyasının çökməsi nəticəsində yaranıb. Sonradan çökəklik yağış suları və yeraltı axınlarla dolub.
Gölün rənginin dəyişməsi onun kimyəvi tərkibi ilə bağlıdır. Su tərkibindəki kükürd və mis birləşmələri və işıq şəraiti nəticəsində rəng dəyişir.
Yaz aylarında göl açıq mavi və firuzəyi rəng alır, yay istisində isə yaşıl, bəzən isə tünd qəhvəyi çalarlar görünür.
Rumıniyanın bu unikal şəhəri həm geoloji tarixi, həm də qeyri-adi təbiət hadisələri ilə Avropanın diqqət çəkən bölgələrindən biri hesab olunur.(qaynarinfo)
