Demokrat.az saytından alınan məlumata görə, ain.az bildirir.
Son illər kirayə mənzil bazarında ən çox rast gəlinən problemlərdən biri də ev sahiblərinin subay şəxslərə ev verməkdən imtina etməsidir. Xüsusilə tələbələr və paytaxta işləmək üçün gələn gənclər mənzil axtarışı zamanı “yalnız ailəyə verilir” şərti ilə tez-tez qarşılaşırlar. Bəzi ev sahibləri bunu əvvəlki mənfi təcrübələrlə əlaqələndirsə də, bir çoxları bu yanaşmanın ayrı-seçkilik olduğunu düşünür. Daşınmaz əmlak və inşaat üzrə ekspert Elnur Azadov mövzu ilə bağlı Demokrat.az-a açıqlamasında bildirib ki, bu Azərbaycanda kirayə mənzil bazarında ən çox rast gəlinən şərtlərdən biridir:“Xüsusilə paytaxt Bakıda və iri şəhərlərdə subay şəxslər mənzil kirayələmək istəyərkən ciddi çətinliklərlə üzləşirlər. Ev sahiblərinin əksəriyyəti ailəli kirayəçilərə daha çox üstünlük verdiklərini gizlətmirlər. Onların fikrincə, ailəli şəxslər həm mənzilə daha məsuliyyətli yanaşır, həm də kirayədə daha uzun müddət qalırlar. Bu isə ev sahibinə tez-tez yeni kirayəçi axtarmaq məcburiyyəti yaratmır. Bir çox ev sahibi hesab edir ki, ailələr mənzilin təmiz saxlanılmasına, əmlakın qorunmasına və kommunal ödənişlərin vaxtında edilməsinə daha diqqətli yanaşırlar. Bundan əlavə, ailəli şəxslərin qonşularla münasibətlərdə daha sakit və sabit davranış sərgilədiyi düşünülür. Bəzi ev sahibləri isə əvvəlki mənfi təcrübələr səbəbindən subay şəxslərə qarşı ehtiyatlı olduqlarını bildirirlər. Xüsusilə tələbə və ya bir neçə nəfərin birlikdə yaşadığı mənzillərdə səs-küy, tez-tez kirayə dəyişiklikləri və mənzilə zərər vurulması kimi halların yaşandığı iddia edilir. Məhz bu səbəbdən kirayə bazarında subay şəxslərə qarşı müəyyən stereotiplər formalaşıb”.Subay şəxslərə qarşı formalaşan stereotiplər isə çox vaxt əvvəlki mənfi təcrübələrlə əlaqələndirilir. Bir neçə nəfərin birlikdə qaldığı evlərdə səs-küy, mənzilə ziyan vurulması və kirayəçilərin tez-tez dəyişməsi kimi hallar ev sahiblərini ehtiyatlı davranmağa məcbur edir. Gənclər isə bu yanaşmanın onlara qarşı açıq ayrı-seçkilik olduğunu hesab edirlər.Qısası, ev sahibləri evlərinin təmiz qalması, ödənişlərin gecikməməsi və qonşularla problem yaşanmaması üçün mənzilləri subay gənclərə deyil, evli şəxslərə verməyə çalışırlar.Leyla Turan
Demokrat.az
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
