Tbilisi, 26 may, AZƏRTAC
Bakı-Tbilisi marşrutu altı ildir fəaliyyət göstərmirdi və bu gün qatar yenidən yola düşür. Bu, bizim üçün çox həyəcanvericidir.
Bu sözləri AZƏRTAC-a müsahibəsində Gürcüstan Dəmir Yollarının baş direktoru Laşa Abaşidze deyib.
Onun sözlərinə görə, bu marşrut bütövlükdə Gürcüstan üçün mühüm əhəmiyyət daşıyır. Xidmətin bərpasından sonra tələbatın yüksək olması səbəbindən qatar hər gün fəaliyyət göstərəcək. O bildirib ki, cəmi bir neçə gün ərzində çox sayda bilet satılıb.
“Buna görə hər kəsi təbrik edirəm. Bu, olduqca uğurlu layihədir. Marşrutun bərpası ilə əlaqədar azərbaycanlı həmkarlarımızla əməkdaşlığı davam etdirəcəyik və bu gündən etibarən Bakı-Tbilisi və Tbilisi-Bakı istiqamətləri üzrə gündəlik reyslər həyata keçiriləcək”, – deyə baş direktor vurğulayıb.
