“Ermənistan heç vaxt anti-Rusiya fəaliyyətlərində iştirak etməyib, iştirak etmir və etməyəcək”.
“Cebheinfo.az”-ın məlumatına görə, Ermənistanın Baş naziri Nikol Paşinyan keçirdiyi mətbuat konfransında belə deyib.
Paşinyan əvvəllər danışdığı bir hadisəni xatırladıb. O qeyd edib ki, rəsmi danışıqlardan biri zamanı bildirilib ki, Avropa İttifaqı-Ermənistan münasibətləri Rusiyanın maraqlarına zərər vurur. Ermənistanın Baş naziri bunun cavabında bir nümunə göstərilməsini xahiş edib. Lakin Paşinyanın sözlərinə görə, belə bir nümunə təqdim olunmayıb, çünki belə bir nümunə yoxdur.
“Deyilir ki, Ukrayna Prezidenti Ermənistana gəlib. Bağışlayın, amma niyə Ermənistana gəlməməli idi? Niyə? Ermənistan Azərbaycanla münaqişə vəziyyətində olanda, Azərbaycan Prezidenti Rusiyaya getmirdimi və ya Rusiya Prezidenti Azərbaycana gəlmirdimi? Heç olubmu ki, biz deyək: niyə Azərbaycan Prezidenti Rusiyaya gedir və ya Rusiya Prezidenti Azərbaycana gəlir?”, - deyə o bildirib.
Ukrayna münaqişəsi ilə bağlı Ermənistanın mövqeyinə toxunan Paşinyan deyib:
“Mən hələ 2022-ci ildə demişdim ki, Ukrayna məsələsində (o zaman KTMT-də fəaliyyətimiz hələ dondurulmamışdı) Ermənistan Rusiyanın müttəfiqi deyil. Bu, çox sadə məntiqdir. Niyə Ukrayna Prezidenti Ermənistana gəlməməli idi, problem nədir?”
