"Mallarını gecə və gündüz, gizli və aşkar (yoxsullara) sərf edənlərin Rəbbi yanında böyük mükafatları vardır. Onların (axirətdə) heç bir qorxusu yoxdur və onlar qəm-qüssə görməzlər..."-Qurani-Kərim, 2-274
Maska taxmış çeçen kişi küçələrdə ehtiyacı olanlara kömək edir və sosial mediada sürətlə populyarlıq qazanan videolar paylaşır.
Moderator.az "İslamnews" nəşrinə istinadla xəbər verir ki, bu haqda "Qroznıy-inform" nəşri məlumat yayıb.
Videoda kişi çətin vəziyyətdə olan insanlara maddi yardım göstərir. Naməlum kişinin xeyirxah əməlləri ictimaiyyətdə böyük əks-səda doğurub: insanlar onun videolarını sosial mediada paylaşır və bu nümunənin onları ianə etməyə təşviq etdiyini etiraf edirlər.
Anonim fəal özü uzun müddətdir insanlara kömək etdiyini, lakin hesab yaratmaq və işlərini internetdə nümayiş etdirmək ideyasının qəfildən ağlına gəldiyini bildirib.
"Uzun müddətdir xeyriyyə işlərində iştirak edirəm, amma bu hesabı yaratmaq və işlərimi paylaşmaq qərarı kortəbii olaraq, sözün əsl mənasında bir gündə yarandı. Bu virtual məkanın əsas məqsədi insanları ruhlandırmaq və motivasiya etməkdir", - deyə o qeyd edib.
Əvvəlcə onun ianələri qəbul etmək və ya başqalarını işinə cəlb etmək planı yox idi. Lakin zaman keçdikcə izləyiciləri ona oxşar xahişlərlə müraciət etməyə başlayıblar.
"Mən heç bir şəkildə insanlardan mənə pul bağışlamalarını istəmirəm, amma çoxları sədəqə vermək istəyirdi. Mən başa düşdüm ki, səmimi qəlbdən xeyirxah işə qoşulmaq istəyənləri geri çevirməməliyəm. Bu gün qazancımın müəyyən faizini ehtiyacı olanlara kömək etmək üçün ayıra bilirəm", - deyə narahat olan çeçen sakini izah edib.
O, kimliyini açıqlamaq niyyətində deyil. O, bir çox abunəçinin onu tanıdığı "Abdullah" adının əsl adı olmadığını aydınlaşdırıb.
S.Laçın
